Qazaqstandyq shoý-bıznes ókilderi Kaspıde qaza tapqan jas áskerılerdiń otbasylaryna kóńil aıtyp, qaıǵylaryn bildirdi, dep habarlaıdy infohub.kz saıty.
Prodúser, akter jáne KVN oıynshysy Nurlan Qoıanbaev bul qaıǵyly oqıǵa barsha qazaqstandyqty dúr silkindirgenin atap ótti. «Otan aldyndaǵy boryshyn ótep, el tynyshtyǵyn qorǵaǵan áskerılerdiń ólimin bárimiz aýyr qabyldadyq. Qaza tapqandardyń otbasyna, týǵan-týystaryna shyn júrekten kóńil aıtamyn. Bul qasirettiń sebebi ashyq ári ádil tekserilýi kerek», — dep jazdy Nurlan Instagram-da.
Aktrısa jáne ánshi Janar Aıjanova da áleýmettik jelide jazba qaldyrdy. «Jas áskerılerdiń jany jánnatta bolsyn. Qaıǵydan qan jutqan analarǵa, uldarynan aıyrylǵan ákelerge, týǵan-týystaryna kóńil aıtamyz. Balalarynyń oralýyn kútken jandardyń qanshama úmiti sóndi. Biraq eshteńeni ózgertý múmkin emes. Qaıǵylaryńdy bólisemiz, qymbattylar», — dep jazdy ol.
Aktrısa Aınur İlsova da qaza tapqandardyń otbasylaryna kóńil aıtty. «Búgin Qazaqstanda Mańǵystaý oblysyndaǵy áskerılerdiń qaza bolýyna baılanysty jalpyulttyq aza tutý jarıalandy. Qaza tapqandardyń otbasyna, týǵan-týystaryna tereń kóńil aıtamyz. Osy orny tolmas qaıǵyny kóterýge kúsh pen tózimdilik tileımiz. Imandy bolsyn», — dep jazdy ol.
Ánshi Altynaı Jorabaeva bul barsha qazaqstandyq úshin orny tolmas qaza ekenin atap ótti. «Ómiri qyzǵan shaǵynda úzilgen sarbazdarymyzdyń ata-analaryna, týǵan-týystaryna eń tereń kóńil aıtamyz», — dep jazdy ol.
Oryndaýshy Aqbota Kerimbekova da qaıǵy jetken otbasylardyń qasiretin bólisti. «Aqtaýda qaza tapqan áskerılerdiń otbasyna Allah sabyr bersin. El qorǵaýǵa attanǵan jastardyń qaza bolýy — barshamyz úshin orny tolmas qaza. Olardyń jaqyndarynyń qaıǵysyn bólisip, kóńil aıtamyz», — delingen onyń jazbasynda.
Akter Danıar Hızmetov áleýmettik jelide jarıalanym jasap, qaza tapqandarǵa qaıǵyryp kóńil aıtty. «Elimizdegi qorqynyshty oqıǵa. Qaza tapqandardyń otbasyna kóńil aıtamyz. Bul týraly aıtý, túsinik berý, oı qorytý qıyn. Allah ár adamnyń ómirin qorǵasyn», — dedi ol.
Sondaı-aq Tolqyn Zabırova, Láılá Sultanqyzy, Asha Mataı, Jeńis Iskakova, Sáken Maıǵazıev, Erke Esmahan, RaiM, Irına Ten jáne basqa da shoý-bıznes juldyzdary kóńil aıtty.
Eske salaıyq, 24 qyrkúıekte oqý-jaýyngerlik tapsyrmany oryndaý barysynda aýa raıynyń kenetten nasharlaýy men ekpindi jeldiń saldarynan Kaspı teńizine 17 áskerı qyzmetshi aǵyzylyp ketken. Úsheýi qutqarylyp, 14-i qaza tapty. Búgin Qazaqstanda jalpyulttyq aza tutý kúni.