Onkologıalyq aýrýlarǵa qarsy otandyq DVC preparaty ekinshi kezeńdegi klınıkalyq synaqtardan ótip jatyr. Barlyq rásimder belgilengen merzimde aıaqtalsa, dári Qazaqstanda kelesi jyly tirkelýi múmkin, dep habarlaıdy infohub.kz.
Ǵylym jáne joǵary bilim mınıstri Saıasat Nurbek úkimettegi brıfıńte: «Munda dál osy doza, aǵzanyń úlken dozaǵa, kishi dozaǵa reaksıasy týraly bolyp otyr. Osy jyldyń sońyna deıin barlyq synaqtardy aıaqtap, dárini aldyn ala tirkeýge ótinim berýge tyrysamyz», — dedi.
Synaqtar aıaqtalǵannan keıin nátıjeler saraptamadan ótýi kerek, sodan keıin preparat memlekettik tirkeýge jiberilýi múmkin. Nurbektiń aıtýynsha, ázirleýshiler tirkeý aldyndaǵy sońǵy satyda tur.
Aldymen preparatty Qazaqstanda jáne Eýrazıalyq ekonomıkalyq odaq elderinde qoldaný úshin tirkeý josparlanýda. Basqa naryqtarǵa shyǵý úshin tıisti memleketterdiń erejelerine sáıkes jeke tirkeý qajet bolady.
Alaıda, 2025 jyly da preparatty jyl sońyna deıin tirkeý josparlanǵanyn, biraq bul oryndalmaǵanyn eskerý kerek, sondyqtan kidirister bolýy múmkin.
Otandyq DVC preparatynyń adamdarǵa klınıkalyq synaqtary 2026 jyldyń naýryz aıynda bastaldy. Buǵan deıin ázirleýshiler janýarlarǵa júrgizilgen doklınıkalyq zertteýlerdiń sátti aıaqtalǵanyn habarlaǵan bolatyn. Mamyr aıynda Saıasat Nurbek adamdarǵa júrgizilgen synaqtardyń birinshi kezeńi aıaqtalǵanyn málimdedi: zertteýge qatysqandardyń barlyǵy tiri, al pasıentterdiń shamamen 30% isikterdiń kishireıgeni baıqaldy.
Qazir mamandar preparattyń ońtaıly dozasyn anyqtap, pasıentterdiń ártúrli dozalarǵa reaksıasyn baǵalaýda. Ázirge tek klınıkalyq synaqtar týraly aıtylyp otyr. Dári tirkelgenge deıin qaýipsizdik, sapa jáne tıimdilikti baǵalaýdyń belgilengen rásimderinen ótýi tıis.