18 jastaǵy qazaqstandyq tenısshi Damır Jalǵasbaı 16 jastaǵy amerıkalyq Safır Azammen birge US Open-2026 jasóspirimder týrnıriniń fınalyna bir qadam jetpeı toqtady. Jartylaı fınalda jup amerıkalyqtar Tanıshka Kondýrı men Marchel Latakaǵa 3:6, 7:6 (8:6), 5:10 esebimen jol berdi, dep habarlaıdy infohub.kz saıty.
Kezdesý dramalyq túrde órbidi. Birinshi sette qatarynan úsh geımdi utylyp, esep 2:1-den 2:4-ke ózgerdi. Damır Safırmen birge partıa sońyna deıin qarymta breık jasaı almaı, 3:6 esebimen jeńildi. Ekinshi sette qazaqstandyq seriktesimen birge 3:1 esebimen alǵa shyqty, biraq basymdyqty saqtaı almady. Degenmen taı-breıkte qarsylastaryn tize búktirdi — 8:6.
Aqyr sońynda bári sýpertaıbreıkte sheshildi. Qazaqstandyq pen amerıkalyq úshin bul týrnırdegi úshinshi sýpertaıbreık boldy, al aldyńǵy ekeýin olar jeńip alǵan: japondyqtar Hú Kavanıshı men Kanta Vatanabege qarsy — 10:4, pýertorıkalyq Iannık Alvares pen AQSH-tyq Raıan Kosadaǵa qarsy — 10:6.
Úshinshi sýpertaıbreık basynan-aq sátsiz bastaldy: 1:3, 2:5, 4:7 jáne 5:10. Tartysty mach 1 saǵat 27 mınýtqa sozyldy. Kondýrı men Lataka bar bolǵany úsh dop artyq utty — 80:77.
Jekeleı synda Jalǵasbaı amerıkalyq Djek Sekordpen bolǵan birinshi machtan keıin raketkasyn qapqa saldy.
US Open-2026-da Elena Rybakına óner kórsetýdi jalǵastyrýda. Dúısenbide álemdik tenıs reıtıńin bastaıtyn Qazaqstannyń birinshi raketkasy fınalda senbiden jeksenbige qaraǵan túni belarýstik Arına Sobolenkomen oınaıdy.
AQSh ashyq chempıonaty — hardta ótetin jyl saıynǵy «Úlken dýlyǵa» týrnıri. Kúntizbelik jyldaǵy tórt meıdjordyń sońǵysy. Jalpy júlde qory — $108 mln, bul meıdjorlar úshin rekord.