Polshanyń Poznan qalasynda ótip jatqan baıdarka men kanoeden álem chempıonatynyń fınalynda qazaqstandyq kanoeshi Sergeı Emelánov jetinshi nátıje kórsetti, dep habarlaıdy infohub.kz.
Olımpıada oıyndarynyń qatysýshysy 200 metr qashyqtyqta kanoe-darada sheshýshi jarysqa joldama aldy. Fınalda Emelánov qashyqtyqty 42,06 sekýndta eńserip, grýzıalyq sportshy Aleksandr Sıvsıvadzemen 7-8 oryndy bólisti. Jeńiske polák Alekseı Koládıch 40,95 sekýnd nátıjemen jetti. Kúmis medaldi ózbekstandyq Artýr Gýlıev (41,05), qolany beıtarap mártebede óner kórsetken belarýs Andreı Jolobov (41,15) ıelendi.
Qazirgi ýaqytta Emelánovtyń nátıjesi týrnırdegi qazaqstandyq qatysýshylar arasynda eń úzdik bolyp otyr. Senbide, 29 tamyzda Marıa Brovkova 500 metr qashyqtyqta kanoe-darada fınalǵa shyǵady, sondaı-aq Ýlána Kıselevamen birge 200 metr qashyqtyqta medal úshin kúresedi.
Sonymen qatar Poznande parasportshylar arasynda jarystar ótip jatyr. Qazaqstandyq Maksım Bogatyrev VL1 klasynda (tirek-qımyl apparaty zaqymdalǵan adamdar) 200 metr qashyqtyqta jetinshi oryn aldy. Marjan Bılálova áıelder arasyndaǵy osy synda toǵyzynshy nátıje kórsetti.