Ál-Farabı atyndaǵy Qazaq ulttyq ýnıversıtetiniń stýdentteri Kazakh Tourism Development Ltd. atqarýshy dırektory Erjan Erkinbaevpen kezdesý uıymdastyryp, Almaty SuperSki jobasy men Kók-Jaılaý aýmaǵyn damytý josparlaryn talqylady. Bul týraly infohub.kz saıty habarlaıdy.
Kezdesýge qatysýshylardy eń aldymen Kók-Jaılaýda qandaı ınfraqurylym salynatyny, jobanyń tabıǵı aýmaqqa jáne almatylyqtardyń taýǵa qatynaý múmkindigine qalaı áser etetini, sondaı-aq týrısik aǵyndy qalaı retteý josparlanyp otyrǵany qyzyqtyrdy.
Erjan Erkinbaevtyń aıtýynsha, búginde joba tóńireginde túrli pikir aıtylyp júr, sondyqtan kompanıa stýdenttermen tikeleı talqylaýǵa jáne týyndaǵan suraqtarǵa jaýap berýge daıyn.
«Bul kezdesýge bizdi stýdentterdiń ózderi shaqyrdy. Men úshin bul — jastardyń Kók-Jaılaý tóńireginde bolyp jatqan jaǵdaıǵa beı-jaı qaramaıtynynyń mańyzdy kórsetkishi. Almaty SuperSki jobasy jóninde túrli pikir aıtylyp júr, al anyqtaýdyń eń tıimdi joly — tikeleı sóılesý», — dedi ol.
Talqylaýǵa sondaı-aq Álpınızm jáne skalolazanıe federasıasynyń prezıdenti Nursultan Shoqanov, QazUÝ-dyń botanıka jáne agroekologıa kafedrasynyń meńgerýshisi, bıologıa ǵylymdarynyń kandıdaty Nursulý Ahtaeva, qoǵam ókilderi men stýdentter qatysty.
Shoqanov taý aýmaǵyn damytý kezinde qala turǵyndaryna qolaılylyq basty qaǵıdattardyń biri bolyp qalýy keregin atap ótti.
Qatysýshylar jobanyń ekologıalyq quramdas bóligin de jeke talqylady. Nursulý Ahtaevanyń aıtýynsha, ǵalymdar aýmaqty zertteýdi jalǵastyryp jatyr. Ol aldyn ala nátıjelerge sáıkes Almaty SuperSki jobasynyń Kók-Jaılaý ekojúıesine teris áseri joq ekenin málimdedi.
Taǵy bir taqyryp — jumyspen qamtý boldy. Stýdentter joba iske qosylǵannan keıin qandaı mamandar qajet bolatynyn jáne almatylyq joǵary oqý oryndarynyń túlekteri taý týrızmi, ekologıa, ınjenerıa jáne servıs salalarynda jumys isteı alatynyn surady.
Erkinbaev jobaǵa túrli baǵyttaǵy mamandar, sonyń ishinde jas túlekter de qajet bolatynyn aıtty.
«Biz úshin Almaty SuperSki jobasynyń damýy tek týrıserge ǵana emes, almatylyqtardyń ózderine de múmkindik týǵyzǵany mańyzdy. Onyń ishinde búginde ýnıversıtetterde oqyp jatqan jas mamandarǵa da», — dedi ol.
Stýdentterdiń ózderi bul bastamany Kók-Jaılaý týraly aqparatty áleýmettik jelilerdegi talqylaýlardan emes, joba ókilderinen tikeleı alý nıetimen túsindirdi.
«Biz úshin Kók-Jaılaý — kartadaǵy dereksiz aýmaq emes. Biz onda jıi bolamyz, bul jerdi jaqsy bilemiz, sondyqtan Almaty SuperSki jobasy júzege asqannan keıin onyń qandaı bolatynyn túsingimiz keledi. Sonymen qatar joba bolashaqta bizge jas maman retinde qandaı múmkindikter beretinin bilý de qyzyq», — dedi kezdesýge qatysýshylardyń biri.
Pikirtalas barysynda jastar Almaty taýlarynyń aldaǵy jyldary qalaı damýy keregi týraly máseleni de kóterdi. Kók-Jaılaý serýendeý men demalys úshin tanymal oryn bolyp qala bergendikten, aýmaqty ózgertý josparlary qala turǵyndarynyń qyzyǵýshylyǵyn týǵyzyp otyr.
Kezdesýdi uıymdastyrǵan stýdentter JANA LEP qoǵamdyq qozǵalysynyń da bastamashylary boldy. Onyń qatysýshylary jastar men belsendi turǵyndardy Almatynyń bolashaǵyn talqylaý tóńireginde biriktirýdi maqsat etetinderin málimdedi.