Brıtandyq boksshy Hamza Shıraz ekinshi orta salmaqtaǵy Dúnıejúzilik boks uıymynyń (WBO) mindetti tıtýlyn qazaqstandyq Jánibek Álimhanulyna qarsy qorǵaýdan bas tartyp, chempıondyq belbeýin óz erkimen bosatty. Bul týraly WBO resmı túrde habarlady, dep jazady infohub.kz saıty.
Uıym Shırazdyń múddesin qorǵaıtyn Queensberry Promotions kompanıasy promoýterlik saýda-sattyq aıaqtalǵan soń boksshynyń sheshimi týraly WBO-ǵa jazbasha habarlaǵanyn rastady.
«Hamza Shıraz resmı úmitker Jánibek Álimhanulyna qarsy mindetti qorǵaýǵa baılanysty promoýterlik saýda-sattyq qorytyndysynda qalyptasqan sharttardy qarastyryp, bul jekpe-jekti ótkizbeýge sheshim qabyldady jáne ekinshi orta salmaqtaǵy WBO álem chempıony tıtýlynan óz erkimen bas tartty», – delingen uıym málimdemesinde.
WBO Shıraz ben onyń komandasynyń sheshimin qurmetteıtinin jetkizdi. Uıymnyń Chempıondyq komıteti bos belbeý mártebesi men dıvızıondaǵy ahýalǵa qatysty kelesi sheshimdi dúısenbide, 21 qyrkúıekte jarıalaıdy.
Buǵan deıin Queensberry Promotions Shıraz – Álimhanuly jekpe-jegin uıymdastyrý quqyǵy úshin saýda-sattyqta 1 001 809 dollar usynyp jeńiske jetken. Qazaqstandyqtyń múddesin qorǵaıtyn Top Rank 820 myń dollar stavka jasaǵan. Jekpe-jektiń yqtımal kúnderi retinde 28 qarasha men 5 jeltoqsan atalsa, ótkiziletin oryndar retinde Ulybrıtanıa men Nú-Iork qarastyrylǵan.
Aıta keteıik, Shıraz saýda-sattyqqa deıin-aq WBO-nyń Álimhanulyn mindetti úmitker etip taǵaıyndaýyna narazylyq bildirgen. Al qazaqstandyq bolsa, kerisinshe, jekpe-jekke daıyn ekenin birneshe ret málimdep, basty maqsaty – chempıondyq belbeý ekenin atap ótken.
Shırazdyń bas tartýy Álimhanulyn avtomatty túrde chempıon etpeıdi. Qazaqstandyq resmı mindetti úmitker kúıinde qalady, al WBO belbeýine aparar joldy uıymnyń Chempıondyq komıteti 21 qyrkúıekte aıqyndaıdy.
WBO reglamentine sáıkes, bos tıtýl uıym sanksıalaǵan jekpe-jekte sarapqa salynýy tıis. Komıtet qoljetimdi eki úzdik úmitkerdi anyqtap, olarǵa kelissóz júrgizý úshin 30 kúnge deıin ýaqyt beredi. Kelisimge kele almasa, WBO promoýterlik saýda-sattyq taǵaıyndaı alady. Osylaısha, endi uıym bosatqan belbeý úshin Álimhanulymen kezdesý quqyǵyn kim alatynyn anyqtaýy kerek.
Tamyzda WBO qazaqstandyq orta salmaqtan ekinshi orta salmaqqa aýysqan soń Álimhanulyn Shırazdyń tıtýlyna resmı mindetti úmitker dep tanyǵan. Buǵan deıin Jánibek 72,6 kg-ǵa deıingi salmaqta WBO jáne IBF chempıondyq belbeýlerin ıelengen.
Álimhanuly kásibı rıngte jeńilis kórmegen – 17 jeńis, onyń 12-si nokaýtpen. Shırazdyń enshisinde – 24 jeńis, bir teń oıyn jáne 19 nokaýt.