«Mersedes» komandasynyń ıtalándyq pıloty Kımı Antonellı «Formýla-1» Ispanıa Gran-prıinde jeńiske jetti. Bul jarys Madrıdte jańa Madring qalalyq trassasynda alǵash ret ótti, dep habarlaıdy infohub.kz saıty.
20 jastaǵy gonshık ekinshi pozısıadan start aldy. Jarys barysynda ol vırtýaldy qaýipsizdik kóliginiń jaǵdaıyn jáne pıt-stop kezinde kósh bastaǵan Lando Norrıstiń ýaqyt joǵaltýyn tıimdi paıdalandy. Nátıjesinde Antonellı alǵa shyǵyp, márege deıin kóshbasshylyqty saqtap qaldy.
Ekinshi oryndy «Red Býll» komandasynyń tórt dúrkin álem chempıony Maks Ferstappen ıelendi. Úshtikti «Maklaren» atynan qazirgi álem chempıony Lando Norrıs túıindedi. Tórtinshi bolyp «Ferrarı» pıloty Sharl Lekler márege jetti, al Antonellıdiń «Mersedestegi» seriktesi Djordj Rassell besinshi orynǵa turaqtady.
Antonellı úshin bul jeńis aǵymdaǵy «Formýla-1» maýsymyndaǵy segizinshi jeńisi boldy. Sonymen qatar ıtalándyq jańa Madring trassasynda álem chempıonaty kezeńiniń alǵashqy jeńimpazy retinde tarıhqa endi.
Ispanıa Gran-prıinen keıin Antonellı álem chempıonatynyń jeke esebinde kóshbasshylyǵyn nyǵaıtty. Endi ıtalándyqtyń qorjynynda 292 upaı bar. Ekinshi orynda 211 upaımen Djordj Rassell tur. Jalpy esepte úshinshi bolyp 191 upaı jınaǵan Lúıs Hemılton kele jatyr.