Qytaıdyń Iýnnan provınsıasynyń ákimshilik ortalyǵy Kýnmın qalasyndaǵy hımıalyq kásiporynda órt shyǵyp, 1200-den astam adam evakýasıalandy. Janyp jatqan kezde atmosferaǵa titirkendirgish býlar shyqqanyn infohub.kz saıty habarlaıdy.
Oqıǵa 4 tamyzda Szınnın aýdanyndaǵy Yunnan Haoming Fine Phosphorus Chemical Company zaýytynda boldy. Jergilikti bıliktiń málimetinshe, órt jergilikti ýaqyt boıynsha saǵat 11:50 shamasynda sary fosfor tıeý kezinde bastalǵan. Oqıǵa ornynda bolǵan barlyq 1257 adam evakýasıalandy. Qaza tapqandar men zardap shekkender týraly habarlanbady.
Órt sol kúni keshki saǵat 22:00 shamasynda tolyǵymen sóndirildi. Resmı habarlamada «apat sary fosfordyń tutanýyna ákeldi, al janý kezinde paıda bolǵan tútin men shań mańaıdaǵy aýdandarda aýa sapasynyń qysqa merzimdi nasharlaýyn týdyrdy» delingen. Bılik mundaı býlar men tútindi jutý kózdiń, murynnyń jáne tynys alý joldarynyń titirkenýin týdyrýy múmkin ekenin eskertti.
Oqıǵadan keıin kásiporyn óndiristik jáne sharýashylyq qyzmetin toqtatty. «Kompanıa óndiris pen sharýashylyq qyzmetin toqtatty. Bılik ekologıalyq monıtorıń pen baǵalaýdy jalǵastyrýda. Órttiń sebepteri tergelýde», — dep habarlady jergilikti bılik.