Jazǵyturym jolaýshylap, shóldep kele jatqan Serikbaı syrttaı syryn biletin bir úıge kelip túsedi. Úıge sálem berip kirse, jalǵyz kempir otyrady. «Sáti boldy» dep oılaǵan ol kempirge qol berip:
— Aman otyrsyz ba? Den saýlyǵyńyz jaqsy ma? Aýyryp qaldy dep edi, táýir boldyńyz ba? Shaldyń densaýlyǵy jaqsy ma? Biz jaqtaǵy týystaryńyz da aman jatyr. Kókteýlikke kóship keletin sıaqty... — dep jalbyraqtap qaıta-qaıta amandasypty. «Shaldyń týǵan-týysqandarynyń nemese jaqyn aǵaıyndarynyń biri bolýy kerek» dep oılaǵan kempir mosyǵa sháýgim asyp qoıyp:
— Qara ózekshilik ýaqyt qoı, shaı qoıǵansha sýsyndap al, — dep ashyǵan kóje beripti. İle-shala dastarhan jaıyp shaı qoıyp jalbyraqtaı kútipti. Serikbaı sýsyny qanyp, qarny toıǵan soń dalaǵa shyǵyp attanbaqshy bolyp jatqanda, úıden ere shyqqan kempir:
— Qaraǵym, atyń kim? Sen meni tanysań da, men seni tanymadym ǵoı, — deıdi. Sonda Serikbaı:
— Men de sizdi tanyǵam joq, kóje men shaıyńyzǵa bola amandasqanym ǵoı, — dep atyna minip júrip ketipti.