Kók-Jaılaý aýmaǵynda 2 myńǵa jýyq Shrenk shyrshasy otyrǵyzyldy. Bul aksıa Almaty SuperSki jobasyn jastarmen talqylaýdyń jalǵasy boldy: buǵan deıin stýdentter bul aýmaqtaǵy ózgeristerdi qurylys jumystarynan emes, kógaldandyrýdan bastaýdy usynǵan edi, dep habarlaıdy infohub.kz saıty.
Aǵash otyrǵyzýǵa stýdentter, ǵalymdar, ekologıa jáne tabıǵı resýrstar mınıstri Álibek Qýantyrov, Almaty ákimi Darhan Satybaldy jáne Kazakh Tourism Development bas atqarýshy dırektory Erjan Erkinbaev qatysty. Kóshetterdi kompanıa qazaqstandyq pıtomnıkterden satyp alǵan.
«Bizdiń ustanymymyz qarapaıym: kez kelgen damý tabıǵatqa qurmetten bastalýy kerek. Sondyqtan Almaty SuperSki jobasyn iske asyrýdyń kelesi kezeńderine deıin biz naqty ekologıalyq áreketterden bastaımyz. Jańa aǵashtar otyrǵyzý – sol qadamdardyń biri», – dedi Erjan Erkinbaev.
Birinshi aǵashty birlesip otyrǵyzǵan soń, qatysýshylar aldyn ala belgilengen ýchaskelerge bólinip, jappaı otyrǵyzýǵa kiristi.
Joba tóńiregindegi basty máselelerdiń biri – qazirgi jasyl jelekterge qatysty. Ekologıa mınıstri Álibek Qýantyrovtyń aıtýynsha, alyp tastaýǵa týra keletin árbir aǵash úshin on eselik ótemaqy qarastyrylǵan.
«Bir aǵash alynǵan jaǵdaıda on aǵash otyrǵyzý arqyly ótemaqy qamtamasyz etiledi. Sonymen qatar, týrısik klaster iske asyrylatyn aımaqta Qyzyl kitapqa engen birde-bir aǵash kóshirilmeıdi nemese alynbaıdy», – dedi mınıstr.
Kazakh Tourism Development kompanıasy joba aýdanynda 13 Sıvers alma aǵashy bar ekenin jáne olardyń ornalasqan jeri ázirleýshilerge belgili ekenin naqtylaıdy.
«Biz olardyń árqaısysyn naqty bilemiz, naqty koordınattarymyz bar, olar buzylmaıdy, kóshirilmeıdi jáne kesilmeıdi», – dedi Erkinbaev.
Sonymen qatar, aýmaqtyń bir bóliginde adam qolymen otyrǵyzylǵan eýropalyq shyrshalar ósedi. Olar endemıkalyq nemese Qyzyl kitapqa engen túrlerge jatpaıdy. Kompanıada kýrstyń jospary osy aǵashtardyń barynsha kóbin saqtap qalýǵa beıimdelip jatqanyn aıtady. Qajet bolsa, bir bóligi kóshiriledi, bir bóligi sanıtarlyq kesýge iligýi múmkin.
Almaty SuperSki jobasynyń negizgi komersıalyq aımaǵy kompanıanyń málimetinshe, 20 gektardan aspaıdy. Aýmaqty ulttyq park quramynan shyǵarý josparlanbaıdy, al jeke vıllalar men kotejder salýǵa tyıym salynǵan.
Almaty ákimi Darhan Satybaldy jastardyń mundaı bastamalarǵa qatysýy tek kógaldandyrýǵa kómek qana emes, sonymen qatar taýly aýmaqtyń bolashaǵyn talqylaýdyń bir bóligi ekenin atap ótti.
«Almaty úshin jas qala turǵyndarynyń qala ómirine belsendi qatysyp, qorshaǵan ortany saqtaýǵa úles qosýy mańyzdy», – dedi ol.
Sonymen qatar, Kók-Jaılaýda ǵylymı zertteýler jalǵasýda. Mamandar flora men faýnany, sý resýrstaryn, topyraqty jáne erozıalyq prosesterdi, arheologıalyq nysandardy, sondaı-aq yqtımal shý júktemesin zerttep jatyr. Jumysqa ál-Farabı atyndaǵy QazUÝ jáne basqa da beıindi uıymdardyń ǵalymdary qatysýda.