VI Dúnıejúzilik kóshpendiler oıynynyń úshinshi jarys kúninde Qazaqstan quramasy 12 altyn medal jeńip aldy, dep habarlaıdy infohub.kz.
Ulttyq aýdaryspaq oıynynda (er eńısh) salt attylar birin-biri attan túsirýge tyrysady. 100 kelige deıingi salmaqta Syrym Izbasarov jeńiske jetip, kóshpendiler oıynynyń úsh dúrkin chempıony atandy. Taǵy bir qazaqstandyq Daryn Ótkelbaı 90 kelige deıingi salmaqta altyn aldy. Nurjan Erkinuly 100 keliden joǵary salmaqta qola júldeger atandy.
Qusbegilik jarysynda Qazaqstan quramasy tórt medal jeńip aldy. Serikbolsyn Jalǵasuly qyrǵımen saıysta úzdik atandy. Arman Koshkarov búrkitpen óner kórsetip, kúmis júldege ıe boldy. Baqdáýlet Babajan suńqarmen saıysta kúmis, al bul synda taǵy bir qazaqstandyq Erlan Kenjetaev qola medal aldy.
Sambodan Bolat Sapar 98 keliden joǵary salmaqta jeńiske jetti. Erkebulan Nyǵmetov (79 kelige deıin) pen Jandos Beısenbaev (64 kelige deıin) qola medal ıelendi.
Qyrǵyz kúresinen qazaqstandyq Almas Jumaǵalı fınalda jeńilip, 100 keliden joǵary salmaqta kúmis júldeger atandy.
Qol kúresinen ulttyq qurama bir kúnde jeti altyn medal jeńip aldy. Chempıon atanǵandar: Nurdáýlet Aıdarhan (90 kelige deıin, sol jáne oń qol), Medet Quttymyratov (90 keliden joǵary, sol jáne oń qol), Malena Sydyqjan (65 keliden joǵary, sol jáne oń qol) jáne Danıl Ýstınov (80 kelige deıin, sol qol). Sondaı-aq bul synda komandanyń qorjynynda taǵy bes medal bar: Uljan Oralbaı eki kúmis (65 kelige deıin, sol jáne oń qol), Ýstınov bir kúmis (oń qol), Baqyt Aqjigitov bir kúmis jáne bir qola (70 kelige deıin, sol jáne oń qol).
Taǵy bir altyndy Qazaqstan quramasy arqan tartýdan jeńip aldy: beısenbide olar 4h4 formatynda úzdik atansa, aldyńǵy kúni 8h8 týrnırinde jeńiske jetken edi.
Kóshpendiler oıyny Qyrǵyzstanda 6 qyrkúıekke deıin jalǵasady.