Qyrǵyzstanda ótip jatqan VI Dúnıejúzilik kóshpendiler oıyndarynda taǵy bir jarys kúni aıaqtaldy. Qazaqstan quramasy jalpy esepte kósh bastap tur, dep habarlaıdy infohub.kz.
Tórtinshi jarys kúni ulttyq qurama toǵyz altyn medal jeńip aldy. Ernur Súleımen 60 kelige deıingi salmaq dárejesinde qazaq kúresinen chempıon atandy. Dástúrli sadaq atýdan Ásemgúl Ǵalymjanova men Aıash Qabdollaeva altyn aldy. Qanat Baqtybaı at ústindegi ulttyq oıyn — teńge ilýden úzdik shyqty. Meıir Rahmetqalıev arqan tartýdan jeke synda jeńiske jetti. Buǵan deıin ol 8h8 jáne 4h4 komandalyq jarystarda da altyn alǵan bolatyn.
At jarysynda tórt qazaqstandyq eń joǵarǵy satyǵa kóterildi. Kóshpendiler oıyndarynyń chempıondary atanǵandar: Nurasyl Bekbatyr (alaman báıge, 25 shaqyrym), Sanjar Ómekeı (qunan báıge, 12 shaqyrym), Ramazan Tabyldıev (ushqyr báıge, 2,4 shaqyrym) jáne Karımjan Qurbanjanov (ushqyr báıge, 3,2 shaqyrym).
Sonymen qatar, juma kúni qazaqstandyqtar bes kúmis jáne jeti qola medal jeńip aldy. Qazaqstan quramasynyń qorjynynda qazir 55 medal bar (25 altyn, 13 kúmis, 17 qola). Komanda jalpy esepte jarys ıeleri — qyrǵyzstandyqtardy (23 altyn, 24 kúmis, 11 qola) basyp ozdy.
Kóshpendiler oıyndary 6 qyrkúıekke deıin jalǵasady.