VI Dúnıejúzilik kóshpendiler oıyndarynyń birinshi kúninde Qazaqstan quramasy ordo, togýz korgool, kýrash, goresh jáne mongol bohe syndy bes túrli baǵytta synǵa tústi, dep habarlaıdy infohub.kz saıty.
Jarystar Qyrǵyzstanda 31 tamyz ben 6 qyrkúıek aralyǵynda ótýde. Qazaqstannan 152 sportshy qatysyp, olar 42 sport túrinen baq synaıdy.
Birinshi kúni qazaqstandyqtar ordo (asyq atý), togýz korgool (toǵyzqumalaq), kýrash, goresh jáne mongol boheden óner kórsetti. Úsh kúres túrinen jarystar aıaqtaldy.
Mongol bohede synǵa túsken Erasyl Amangeldi men goreshte baq synaǵan Madıar Abdrahmanov qarsylastarynan utyldy.
Togýz korgool jarystary 6 qyrkúıekke deıin jalǵasady, al ordo boıynsha fınaldyq oıyndar 2 qyrkúıekke josparlanǵan.
Oıyndardyń ekinshi kúninde qazaqstandyq sportshylar kókpar, kókbóri, er eńısh (aýdaryspaq), alysh, ovarı, mangala, togýz korgool, at jarysy, ordo, qus salý, jamby atý, dástúrli sadaq atý, mass-restlıng, arqan tartý, sýmo, strongmen jáne jilik syndyrýdan synǵa túsedi.
Ashylý saltanatynda Qazaqstannyń memlekettik týyn kókpardan álem chempıony, ulttyq qurama kapıtany Turǵanbek Qurmanbek kóterdi.
Buǵan deıin «Kýrsıv» VI Dúnıejúzilik kóshpendiler oıyndarynyń «Bishkek-Arena» stadıonynda ótken ashylý saltanaty áleýmettik jelilerde keń rezonans týdyrǵanyn jazǵan bolatyn. Shoýdy daıyndaýǵa qazaqstandyq Wakeuphana komandasy rejıser-qoıýshy Andreı Hvannyń jetekshiligimen, sondaı-aq tehnıkalyq jáne vızýaldy bóligine jaýapty Upstage jáne Filmotion kompanıalary qatysty.
Qoıylymǵa Qazaqstan, Qyrǵyzstan, Ózbekstan jáne Reseıden shamamen 2 myń bıshi tartyldy. Kórermenderdiń erekshe nazaryn qar barysy men qus beıneleri qamtylǵan aýqymdy sahnalyq elementter aýdardy.