Qazaqstan Kóshpendiler oıynynyń medal esebinde qaıta sanaýdan keıin birinshi orynǵa shyqty, dep habarlaıdy infohub.kz saıty.
Qyrǵyzstan prezıdentiniń baspasóz hatshysy Askat Alagozov Facebook-tegi jazbasynda Bishkekte ótken jarystardyń qorytyndysyn qaıta sanaý týraly aıtty. Ol VI Dúnıejúzilik kóshpendiler oıyndary joǵary deńgeıde ótip, úlken sporttyq mereke retinde aıaqtalǵanyn atap ótti. Ásirese kókpar men jer-ulaq jarystary tartymdy ótti, onda qyrǵyz jáne qazaq komandalary tamasha oıyn kórsetip, sporttyq básekelestik tek alańda ǵana ekenin taǵy bir ret dáleldedi.
Alagozov jankúıerler arasynda da eshqandaı kelispeýshilik bolmaǵanyn, osy úshin eki halyqtyń sportshylary men jankúıerlerine erekshe alǵys bildiretinin aıtty. Komandalyq esepte jalǵyz tehnıkalyq sáıkessizdik medaldardy sanaý kezinde oryn aldy. Búgin uıymdastyrý komıteti Qazaqstannyń úsh sportshysynyń árqaısysynyń medaldaryn jeke esepke alý týraly sheshim qabyldady. Osylaısha, jalpy komandalyq esepte birinshi oryndy Qazaqstan ıelendi. Qazaq baýyrlardy jeńisimen quttyqtaımyz!
Ol qyrǵyzstandyq sportshylardyń da bul oıyndarda óz kúshteri men sheberlikterin kórsete otyryp, laıyqty óner kórsetkenin qosty. Medal esebi — sporttyń bir ǵana quramdas bóligi. Al bul oıyndardyń basty jeńisi — jarystardy ózara qurmet pen ádil básekelestik rýhynda ótkize bilýimiz, baýyrlas halyqtardyń birligi men yqpaldastyǵyn taǵy bir ret kórsetýimiz.
Sonymen qatar, Oıyndardyń resmı saıtynda áli kúnge deıin jalpy qorytyndy esep joq. Paıdalanýshylarǵa tek VI Dúnıejúzilik kóshpendiler oıyndarynyń túpkilikti medal esebi Oıyndar hatshylyǵynan qorytyndy aqparat túskennen keıin jarıalanatyny týraly eskertý ǵana qoljetimdi.
Buǵan deıin Kóshpendiler oıynynyń qorytyndysy boıynsha medal esebine qatysty janjal týyndaǵan bolatyn. Uıymdastyrýshylar Qazaqstan quramasynyń altyn medaldarynyń sany Týrızm jáne sport mınıstrliginiń esebinen tómen bolǵan qorytyndy nusqany usyndy. Mundaı formatta jalpy esepte birinshi orynda Qazaqstan emes, Qyrǵyzstan turdy. Keıin uıymdastyrýshylar jarıalanymdy joıyp, hattamalyq aqparat jınaý jalǵasyp jatqandyqtan, medal reıtıńiniń túpkilikti nusqasy joq ekenin málimdedi. Qyrǵyzstannyń sport jónindegi memlekettik agenttiginde jalpy komandalyq esep Kóshpendiler oıyny tujyrymdamasyna sáıkes múldem júrgizilmeıtinin atap ótti. Keıin Qazaqstannyń týrızm jáne sport mınıstri Erbol Myrzabosynov Qyrǵyz Respýblıkasy Mınıstrler Kabıneti janyndaǵy Dene shynyqtyrý jáne sport jónindegi memlekettik agenttiginiń dırektory Ýrmat Asanbaevpen Kóshpendiler oıynynyń qorytyndysyn talqylaǵanyn málimdedi.