Áleýmettik jelilerde Qostanaıdaǵy oqý oryndarynda terakt jasalady degen aqparat tarady. Quqyq qorǵaý organdary atalǵan nysandardy dereý tekserip, jazba avtoryn izdeýge kiristi, dep habarlaıdy infohub.kz saıty.
«TobolInfo» basylymynyń málimetinshe, Telegram messendjeriniń bir arnasynda qaladaǵy birqatar oqý ornyna qatysty qaýip tóndiretin habarlamalar paıda bolǵan. Tizimde Qostanaı óńirlik ýnıversıteti, polıtehnıkalyq jáne medısınalyq kolejder, sondaı-aq №17 orta mektebi atalǵan.
Belgisiz bireý ǵımarattarǵa jarylǵysh qurylǵylar qoıylǵanyn jáne quqyqqa qaıshy áreketterge daıyndalyp jatqanyn málimdegen. Árekettiń bastalý kúni retinde 7 qazan kórsetilgen.
Qostanaı oblysy polısıa departamentiniń baspasóz qyzmeti NUR.KZ tilshisine aqparat túsken soń shuǵyl tekserý júrgizilgenin habarlady. «Hatta kórsetilgen barlyq ǵımarat tekserildi. Jarylǵysh zattar, jarylǵysh qurylǵylar jáne ózge de kúdikti zattar tabylǵan joq. Qostanaı oqý oryndarynda jasalady dep josparlanǵan terakt týraly aqparatty áleýmettik jelilerde taratý faktisi boıynsha polısıa sotqa deıingi tergep-tekserý bastady», — dep sendirdi polısıada.
Oblystyq polısıa departamenti qazir jazba avtory men bolǵan oqıǵanyń barlyq mán-jaıy anyqtalyp jatqanyn qosty.
Sonymen qatar azamattardy sabyr saqtaýǵa, úreıge boı almaýǵa jáne tekserilmegen aqparatty taratpaýǵa shaqyrdy. Polısıa kórineý jalǵan habarlama taratqany úshin qylmystyq jaýapkershilik qarastyrylǵanyn eske saldy.