InfoHub Logo

Buıra tolqyny kóbiktenip aspanǵa atylyp jatqan Ertistiń jıeginde sýǵa tónip kúlimdep turǵan Nura men Tólegen gúr ete qalǵan sýdyń qatty daýsynan eleń ete tústi.

Asaý, arda Ertistiń tolqyny arystannyń jalyndaı bolyp býyrqanyp jatyr.

Tolqyn keıde burq-burq etip shıyrshyq atady, keıde túbinen synyp sylq etip qulaǵan báıterekshe lyqsyp biriniń ústine biri qulap, ekinshisi kóterip, yqqa qaraı jón siltegen sıaqty.

- Mine, — dedi Tólegen tolqynǵa qumarta qarap, — asaýdyń asaýy tolqyndaı-aq bolar. Eger, munyń aldynan arpalysqan bir kúsh bóget bolsa, anaý úıdeı - úıdeı bolyp dóńbekship jatqan tolqynmen tóbelespegende nesi qaldy?

- Ia,— dedi Nura da fızıkadaǵy bir zańdy esine túsirip. — Ol qarsy soqqan kúshke baılanysty ǵoı.

- Sen etken jyly jazǵy tekserý synynda fızıkadan nashar baǵamen óttim, kúz qaıta ótkizemin degeniń qaıda, bul zańdy qaıdan bilesiń?

- Tipti fızıkadan esimde esh nárse qalmasyn deısiń be?

- Joq, joq, — dedi Tólegen sasqalaqtap, — jaz daıyndalǵan shyǵarsyń?

- Aldaǵanym ǵoı, men fızıkadan nashar oqydym degenge nanyp qalǵanyń ba?

Ol sóıdedi de, kenet lagerdegi óziniń palatasyna júgirip ketti. Tólegen Nuranyń nege júgirip ketkenin bile almaı, onyń sońynan qýa jónelgisi keldi de ózin-ózi toqtatty.

Ertistiń boıyndaǵy tamasha kóriniske tesile qarap turǵan Tólegen janyna entigip júgirip kelgen Nurany baıqamaı da qaldy.

- Mine, meniń baǵalarym, — dep Nura óziniń jyl aıaǵynda mektepten alǵan kýálik qaǵazyn usyndy. Qaǵazǵa qansha qarasa da Tólegen «otlıchno» degen sózden bóten baǵa taba almady. Ol fızıka degen jerge erekshe úńile qarady da:

- Molodes, Nura, men túneýgi óziń fızıkadan ótkize almadym degennen beri saǵan qalaı járdem bersem dep oılaıtyn edim, — dedi.

Lager kúni aıaqtalýǵa jaqyndady...

Tólegender dem alyp jatqan lager Ertistiń jaǵasynda.

Jaǵalaı qalyń orman, qyzyl gúl, olardyń bári de búgin balalarǵa: «Qosh», — dep qolyn bulǵaǵandaı kórinedi.

Soltústikten ebip ósken jibek jel Tólegenniń moınyndaǵy qyzyl galstýgin jelbiretip tur.

Balalar Ertistiń jaǵasyndaǵy kók jibekteı aıaqqa oralǵan shalǵyn arasynan gúl terýge kiriskende, Tólegen aýzyn ashyp ókpek jeldiń soqqan lebimen teńselip turǵan bir qyzyl gúlge qarap oıǵa batty.

- Bizdiń ómirimiz de osy qyzyl gúldeı ǵoı, — dedi ol gúlge bir, kúnge bir qarap.

Onyń esine bıyl Almatyǵa baryp oqıtyny tústi.

Mine, búgin lager jabylady, balalar aýlyna qaıtady.

Tólegenniń qımaıtyny jaz boıy birge bolǵan joldastary.

Lager palatalary jaǵynan mashınanyń gúrildegen daýsy shyqty.

Tólegen sol jaqqa qaraı bettedi.

Aýdannan kelgen balalar óz aýdandaryna qaıtý kerek. Balalar bir-birin qımaı qushaqtasyp, qol alysyp qoshtasyp jatty.

Birin-biri qımaǵan kishkentaı azamattar, birine-biri adresin berip jatty. Tólegendi Nura, Turysbek, Ásen úsheýi aınala qorshap tur.

Qazir Tólegen júredi, bular eń áýeli Tólegenmen qoshtaspaq. Bári de onyń qolyn qysyp, qushaqtasyp jatyr.

- Hat jazarsyń, Tólegen!

- Árıne, — deıdi ol.

Mashına jolǵa shyqqanda basyn ızep qosh - qoshtaǵan balalardyń daýsy mashınanyń gúrilimen ulasty.

Zymyrap kele jatqan mashına ústinde otyryp pıonerler qýanyshty án shyrqaýmen qara joldy qaq aıyra belden asyp ketti...

---