Ресейдің халық әртісі Лариса Долинаның заңгерлері әнші қатысқан жарияланымдарды, коллаждар мен мемдерді қорлау мен қадір-қасиетін кемсіту тұрғысынан тексеруге ниетті. Құқықтық тексеру жоспары туралы әртіс директоры Сергей Пудовкин мәлімдеді, деп хабарлайды infohub.kz сайты.
Пудовкиннің айтуынша, қорлау фактілері анықталса, ар-намыс пен қадір-қасиетті қорғау туралы талап арыз сотқа беріледі. «Мен және төрт заңгер Лариса Долина есімінің барлық аталуын мұқият тексереміз. Егер осы есімді заңсыз пайдалануды, қорлауды, беделге қасақана зиян келтіру әрекетін байқасақ — бұл фотоматериалдарға, дипфейктерге, коллаждарға да қатысты — дереу ар-намыс пен қадір-қасиетті қорғау туралы арыз беріледі», — деді ол.
Әншінің директоры мемдерді тексеру жұмысы тәулік бойы жүргізілетінін қосты. Сонымен қатар Пудовкин Долинаның бейнесі мен есімін заңсыз пайдаланған үш компанияға — жиһаз фабрикасына, интернет-дүкенге және банкке — Басман сотына арыз бергенін хабарлады.
Еске салайық, 2024 жылдың жазында Лариса Долинаның күрделі оқиғаға тап болғаны туралы ақпарат шыққан. Анықталғандай, ресейлік әншіні алаяқтар алдаған: пәтерін сатып, ақшаны олардың шотына салуға көндірген. Сол кездегі шығын көлемі 200 млн рубльден астам деп бағаланған. Алайда кейін банктердің операциялар үшін комиссиясы мен мәміле шығыстарын қосқанда жалпы шығын 317 млн рубльден асқан.
2025 жылдың қарашасында Лариса Долинаның пәтеріне қатысты алаяқтық ісі бойынша айыпталушыларға үкім шығарылды — сот оларға 4 жылдан 7 жылға дейін бас бостандығынан айыру жазасын тағайындады. 2026 жылдың 8 қыркүйегінде Лариса Долина өзін алдаған алаяқтардан 144 млн рубльден астам қаражат өндіріп алды.