Jańa Lexus GX 550-niń kapoty qolmen basqanda ıilip ketetini kórsetilgen vıdeo ınternette qyzý talqyǵa tústi, dep habarlaıdy infohub.kz saıty.

Avtobloger Nazar Iýshýk Threads jelisinde bir kórmede kórsetilgen jańa Lexus GX 550-diń vıdeosyn jarıalady. Beınejazbada premıým kóliktiń kapoty azdaǵan kúsh túskende aıtarlyqtaı ıiletini baıqalady.

Jazba belsendi pikirtalas týǵyzdy: keıbir paıdalanýshylar metaldy «folga» dep atasa, endi bireýleri bul qaýipsizdiktiń qazirgi talaptaryna baılanysty erekshelik ekenin túsindirdi.

Keıbir pikir qaldyrýshylar kórgenderine ázilmen qarady:

«Jaqsy folga. Boıaýyn sylyp tastasa, demalysta balyq pisirýge bolady».

«Meniń 140-shy qabanym (Mercedes-Benz W140 – red.) basqasha, onymen KamAZ-dardy soǵýǵa bolady».

«Tipti meniń qytaı kóligimde de ondaı emes».

Kóptegen paıdalanýshylar ıiletin kapot kemshilik emes ekenin eske saldy:

«Bul plasmassa emes, alúmını, aldyńǵy qanattary plasık. Qazirgi talaptar (ásirese Toyota/Lexus-ta qatań) kóliktiń aldyńǵy bóligin jumsaq etýdi mindetteıdi. Jaıaý júrginshimen soqtyǵysqanda ıkemdi alúmını kapot pen plasık qanattar deformasıalanyp, soqqyny jutady».

Pikirlerde kapottyń jumsaqtyǵy jolaýshylardyń nemese jaıaý júrginshilerdiń qaýipsizdigine qatysty degen talastar da boldy. Keıbir paıdalanýshylardyń pikirinshe, syrtqy kýzov panelderi jaıaý júrginshilerdiń jaraqat alýyn azaıtý úshin jasalsa, salondaǵy adamdardyń qorǵanysyn kúsh karkasy, baǵdarlamalanatyn deformasıa aımaqtary, beldikter men qaýipsizdik jastyqtary qamtamasyz etedi.

Bir pikir qaldyrýshy ıronıamen bylaı dedi:

«2026 jyl, adamdar áli de kólik tankteı bolýy kerek dep oılaıdy».

Lexus GX 550-diń (gıbrıdti nusqasyn qosa) IIHS (AQSh saqtandyrý qaýipsizdik ınstıtýty) nemese Euro NCAP (Eýropalyq jańa avtokólikterdi baǵalaý baǵdarlamasy) uıymdary tarapynan resmı synaqtary ázirge júrgizilgen joq. Model AQSH-ta synaqqa tańdalǵan, biraq nátıjeleri áli jarıalanǵan joq.

Bul birinshi osyndaı vıdeo emes. 2025 jyly taǵy bir bloger Lexus LX 700h kóliginiń kýzov qattylyǵyn kórsetken edi.

Iiletin kapot ózdiginen kóliktiń sapasyzdyǵyn bildirmeıdi. Zamanaýı kólikter, ásirese synaqtardan joǵary bal alýǵa baǵyttalǵandar, jıi alúmını syrtqy paneldermen jabdyqtalady. Olar bolattan jeńil, syrtqy áserge ońaı deformasıalanady jáne kólik salmaǵyn azaıtýǵa kómektesedi.

Kýzovtyń beriktigin syrtqy metal emes, kúsh qurylymy, kapottyń ishki qańqasy jáne baǵdarlamalanatyn deformasıa aımaqtary anyqtaıdy. Sondyqtan paneldi qolmen basqanda ıilýi kóliktiń qaýipsizdigi tómen degendi bildirmeıdi.

Buǵan deıin basylym Lexus LX jáne GX-tiń Dark Horse konsepsıasyn alǵanyn jazǵan edi.