Mańǵystaý oblysyndaǵy tas jolda motosıklmen saıahattaǵan Ispanıanyń úsh azamaty qıyn jaǵdaıǵa tap boldy. Oqıǵa respýblıkalyq mańyzy bar Shetpe — Beıneý tas jolynda bolǵan, bir motosıkl buzylyp qalǵan. Sheteldikterge Mańǵystaý oblysy polısıa departamenti patrúldik polısıa rotasynyń qyzmetkerleri Qanat Ismaǵulov pen Qurmanǵazy Bıtıbaev kómekke keldi, dep habarlaıdy infohub.kz saıty.
«QR İİM jańalyqtary» Telegram-arnasynda habarlanǵandaı, týrıser Aqtaýdan otanyna qaıtyp bara jatqan. Jolda bir motosıkl isten shyǵyp, eki saıahatshy polıseılerden kómek suraǵan. Tártip saqshylary júk kóligin toqtatyp, júrgizýshiden aqaýly motosıkldi Beıneýge deıin jetkizýdi ótingen. Júrgizýshi kómektesýge kelisip, motosıkl kólikke tıelgen.
Polıseıler týrısermen aǵylshyn tilinde erkin sóılesip, qajetti qoldaý kórsetken. Sheteldik azamattar kórsetilgen kómek úshin alǵys bildirip, polısıa qyzmetkerlerine rızashylyǵyn jetkizgen, delingen vedomstvo habarlamasynda.