Qazaqstandyq jeńilis bilmegen boksshy Meıirim Nursultanov pen WBC-niń orta salmaqtaǵy ýaqytsha chempıony Hesýs Ramos arasyndaǵy 20 qyrkúıekke josparlanǵan tıtýldyq jekpe-jek ótpeıtin boldy. Amerıkandyq sportshynyń jekpe-jek qarsańynda densaýlyǵy kúrt nasharlaǵan – osy sebepten kezdesý toqtatyldy, dep habarlaıdy infohub.kz saıty.
BoxingScene aqparatynsha, Ramos taǵamnan ýlanyp qalǵan. Beısenbi kúni keshke boksshy ózin nashar sezinip, San-Dıegodaǵy aýrýhanalardyń birine jetkizilgen. Juma kúni tańerteń ol aýrýhanadan shyǵaryldy, alaıda Nursultanovpen jekpe-jek ólsheý rásiminiń dál aldynda kardtan alynyp tastaldy.
Premier Boxing Champions jekpe-jektiń basqa kúnge aýystyrylatynyn rastady. Kezdesýdiń jańa merzimi ázirge jarıalanǵan joq.
Nursultanov úsh jylǵa jýyq ýaqyttan keıingi alǵashqy jekpe-jegin ótkizýi tıis edi. Qazaqstandyq boksshy sońǵy ret 2023 jyldyń qarashasynda rıngke shyǵyp, tóreshilerdiń biraýyzdan sheshimimen chılılik Hýlıo Alamossty jeńgen bolatyn. Kásibı rıngte 33 jastaǵy boksshy áli jeńilis kórmegen – 20 jeńisi bar, onyń 11-i nokaýtpen aıaqtalǵan.
Ramospen jekpe-jek Nursultanov úshin álemdik tıtýldy jeńip alýdyń alǵashqy múmkindigi bolýy tıis edi. Amerıkandyqqa tıesili WBC-niń orta salmaqtaǵy ýaqytsha chempıon belbeýi sarapqa salynǵaly otyrǵan. WBC buǵan deıin osy kezdesýdiń jeńimpazy uıymnyń tolyqqandy chempıony Karlos Adamespen jekpe-jek ótkizý quqyǵyna ıe bolatynyn rastaǵan.
Ramos aýystyrylǵan jekpe-jekke 24 jeńis pen bir jeńilis rekordymen kele jatyr, 19 jekpe-jegin merziminen buryn aıaqtaǵan. Amerıkalyq WBC-niń ýaqytsha belbeýin 2025 jyldyń jeltoqsanynda Sheın Mozlı-kishini tóreshilerdiń biraýyzdan sheshimimen jeńip alyp edi.