Qazaqstan boks federasıasynyń vıse-prezıdenti Mereı Aqshalov Almaty áýejaıyndaǵy kezekti janjalǵa tap bolǵan 2016 jylǵy olımpıada chempıony Danıar Eleýsinovti jarıa túrde qoldady, dep habarlaıdy infohub.kz saıty.
Aqshalov óz ustanymyn Instagram paraqshasyndaǵy jazbasynda bildirdi. Ol 2016 jylǵy Olımpıada oıyndary chempıonynyń ómirindegi birqatar janjaldy oqıǵalarǵa qaramastan, Eleýsinovke degen senimin jalǵastyratynyn atap ótti. Qazaqstan boks federasıasy vıse-prezıdentiniń aıtýynsha, ómirde de, sportta da zań men tártip talaptary eldegi árbir azamat úshin birdeı jáne teń.
«Biraq qazir men qıyn jaǵdaıǵa tap bolǵan aǵam Danıar Eleýsinovke qoldaý bildirgim keledi. Danıar — olımpıada chempıony, elimizdiń týyn birneshe ret kótergen eńbek sińirgen sportshy. Barlyǵymyz adambyz, ómirde qatelesýimiz múmkin. Eń bastysy — óz qatelikterińnen durys qorytyndy jasaý. Men Danıarǵa senemin. Oǵan osy qıyn kezeńnen laıyqty ótip, elimizdiń sportyn damytýǵa úles qosýyn jalǵastyrýyn tileımin», — dep jazdy Aqshalov.
Buǵan deıin Almaty áýejaıynda jolaýshynyń Almaty — Astana reısinde dúrbeleń týdyrǵany habarlanǵan. BAQ oqıǵa ornynan beınejazba jarıalady, al qolda bar derekterge sáıkes, ol jolaýshy Danıar Eleýsinov bolyp shyqty.
Odan buryn, shilde aıynyń basynda Eleýsinov qamaýǵa alynyp, júrgizýshi kýáliginen aıyrylǵan. Astana polısıasy onyń JKO-dan keıingi ustalý barysyn da kórsetti. Osy oqıǵalardan keıin Eleýsinov alǵash ret аlkogólge qatysty máseleleri týraly ashyq málimdep, jankúıerlerine júgindi.