Qazaqstanda mıkroqarjy uıymy lısenzıasynan aıyrylsa, bergen kredıtteri avtomatty túrde esepten shyǵarylmaıdy. Bul jaǵdaıda qaryz alýshylar qaryzyn qalaı óteýi kerek? infohub.kz saıty habarlaıdy.
Mıkroqarjy uıymy qyzmetin júrgizýge lısenzıasynan aıyrylǵan jaǵdaılar bolady. Alaıda Qazaqstan Respýblıkasynyń Qarjy naryǵyn retteý jáne damytý agenttiginiń málimetinshe, mıkroqarjy uıymynyń taratylýy nemese bankrottyǵy berilgen kredıtterdiń avtomatty túrde esepten shyǵarylýyn bildirmeıdi.
Bankterdegideı, qaryz alýshylar alynǵan aqshany qaıtaryp, syıaqyny tóleýge mindetti.
Óteý tártibi talap etý quqyǵynyń basqa kredıtorǵa berilgen-berilmegenine baılanysty.
Eger talap etý quqyǵy berilmese, qaryz alýshy shart talaptaryna jáne onda kórsetilgen derektemelerge sáıkes qaryzyn tóleýdi jalǵastyrady.
Eger bereshek basqa qarjy uıymyna nemese kolektorlyq agenttikke berilip, tólem derektemeleri ózgerse, qaryz alýshyǵa kredıtordyń aýysqany jáne qaryzdy óteý tártibi týraly tıisti túrde habarlaý qajet.
Qıyndyqtarǵa tap bolmas úshin mıkroqarjy uıymynyń jabylǵany nemese lısenzıasynyń qaıtaryp alynǵany týraly aqparatqa baılanysty tólemdi toqtatýǵa bolmaıdy. Tólem jasamas buryn talap etý quqyǵy kimge tıesili ekenin jáne qandaı derektemelerdiń ózekti ekenin tekserý qajet.
Mıkroqarjy uıymynyń lısenzıasy zańnamany júıeli túrde buzǵany, sondaı-aq prýdensıaldyq jáne basqa da normatıvterdi saqtamaǵany úshin toqtatylýy nemese qaıtaryp alynýy múmkin.
2026 jylǵy 1 qyrkúıektegi jaǵdaı boıynsha Qazaqstanda 217 mıkroqarjy uıymy jumys istegen. Jyl basynan beri 8 mıkroqarjy uıymynyń lısenzıasy qaıtaryp alynyp, taǵy ekeýiniń lısenzıasynyń qoldanylýy toqtatyldy.
Sondyqtan mıkrokredıt rásimdeý aldynda uıymnyń mıkroqarjylyq qyzmetti júzege asyrýǵa jaramdy lısenzıasy bar ekenine kóz jetkizý qajet. Onyń bar-joǵyn resmı tizilimnen tekserýge bolady.
Sondaı-aq, mıkroqarjy uıymymen máseleler, daýlar nemese janjaldar týyndaǵan jaǵdaıda qazaqstandyqtar mıkroqarjy ombýdsmanyna kómek surap júgine alady. Onyń qyzmetteri azamattar úshin tegin, al sheshimderi oryndalýǵa mindetti.
Al buǵan deıin biz kredıt bergen bank lısenzıasynan aıyrylsa, búkil kredıtti birden jabý kerek pe degen suraqqa jaýap bergen bolatynbyz.