2026 jyldyń sońyna deıin erekshe qajettilikteri bar balalardy úı jaǵdaıynda ońaltý pılottyq jobasy Qazaqstannyń taǵy tórt óńirin qamtıdy. Qazir ol Shymkentte, Qyzylorda, Pavlodar oblystarynda jáne Abaı oblysynda jumys istep tur, dep habarlaıdy infohub.kz saıty.
Eńbek jáne halyqty áleýmettik qorǵaý mınıstrliginiń málimetinshe, búginde osy óńirlerde 642 bala úıde keshendi ońaltýdan ótip jatyr, olardyń 500-inde oń dınamıka baıqalǵan.
«QH Múgedek balalardy úıde ońaltý» jobasy taǵy tórt óńirge keńeıtiletini habarlandy, alaıda naqty qandaı oblystar ekeni aıtylmady.
Eske salaıyq, múgedek balalardy úıde ońaltý eldiń tórt óńirinde 2024 jyly engizilgen bolatyn. Bas maqsat – balanyń úıdegi ádettegi jaǵdaıda, mamandardyń súıemeldeýimen qajetti ońaltý kýrsynan ótýi.
Barlyǵy qalaı uıymdastyrylǵan: joba aıasynda aldymen mamandar balalardyń jaǵdaıyn, olardyń jeke qajettilikterin, sondaı-aq turmys jaǵdaıyn baǵalaıdy. Sodan keıin beıimdelgish kreslolar, vertıkalızatorlar, hodýnkı jáne ártúrli jattyǵý qurylǵylary bolýy múmkin tehnıkalyq ońaltý quraldary tańdalady. Barlyq qajetti jabdyqty balanyń úıine tikeleı jetkizip, ýaqytsha paıdalanýǵa beredi.
«Ata-analarǵa tehnıkalyq quraldardy qaýipsiz paıdalanýǵa jáne qajetti jattyǵýlardy oryndaýǵa úıretedi. Kýrstyń uzaqtyǵy men mazmuny ár jaǵdaıda jeke anyqtalady», – delingen habarlamada.
Jobanyń nátıjeleri qandaı: kishkentaı pasıentterdegi oń dınamıka naqty ózgerister boıynsha baǵalanatyny atap ótiledi. Ol úshin Bartel, FIM jáne ÝNODN shkalalary qoldanylady. Sonymen qatar, balanyń basyn jaqsy ustaýdy úırengeni, ózdiginen otyrýy nemese turýy, aıaqqa turýy, júrý daǵdylarynyń jaqsarǵany eskeriledi.
Eńbek mınıstrliginde joba bastalǵaly 138 bala basyn jaqsy ustaı bastaǵanyn, 83-i ózdiginen otyratynyn, 49-y qoldaýmen júretinin, taǵy 35 bala ózdiginen júre bastaǵanyn atap ótti.