PetroMining qaýymdastyǵy munaı-gaz salasy kásiporyndarynyń ustanymyn úkimetke jetkize aldy. Úkimet 2027 jyldyń 1 qańtarynan bastap janar-jaǵarmaı materıaldaryn (JJM) satýǵa qosymsha aksızderdi engizbeýge kelisti. Buǵan deıin mólsherlemelerdi qazirgi 50%-dan 95%-ǵa deıin kóterý josparlanǵan edi, dep habarlaıdy infohub.kz saıty.
Qoldanystaǵy normalar boıynsha munaı-gaz salasynyń sýbektileri munaı ónimderi qunynyń ósý somasynyń 50%-yn tóleýge tıis. Mysaly, Astanadaǵy keıbir iri JQS jelilerinde qyrkúıekte tamyzben salystyrǵanda Aı-92 benzıniniń nemese dızel otynynyń lıtri alty teńgege qymbattaǵanyn alatyn bolsaq, osy alty teńgeniń úsheýin memleket aksız retinde alyp qaldy.
Al úkimet munaı ónimderi qunynyń ósý somasynyń 95%-yn, ıaǵnı shartty túrde baǵa 100 teńgege ósse, sonyń 95 teńgesin alyp qoımaq boldy. Bul naryq oıynshylary úshin baǵanyń ósýiniń barlyq mánin joqqa shyǵarar edi.
«Buǵan deıin PetroMining qaýymdastyǵy munaı ónimderin kóterme jetkizýshiler úshin qosymsha aksız mólsherlemelerin ulǵaıtý arqyly salyq júktemesiniń artý qaýpi týraly habarlaǵan bolatyn. Qazirgi 50%-dyń ornyna alynǵan marjanyń 95%-yn alyp qoıý kózdelgen. Úkimettiń № 1049 qaýlysyna engizilgen ózgerister aǵymdaǵy jyldyń 1 qyrkúıeginen bastap qoldanysqa engizilip, merzimsiz áreket etedi… Nátıjesinde premer-mınıstr osy sharanyń 2027 jyldyń basynan bastap qoldanylýyn toqtata turý týraly sheshim qabyldady», – delingen taratylǵan habarlamada. Onda 95%-dyq qosymsha aksızderdi engizý qandaı merzimge toqtatylǵany naqtylanbaǵan.
Salalyq qaýymdastyq munaı ónimderin kóterme jetkizýshilerden (MÓKJ) 95%-dy alyp qoıa otyryp, qosymsha aksız mólsherlemelerin kóterý úkimet júrgizgen JJM baǵasyn lıberaldandyrýdyń áserin is júzinde joqqa shyǵaratynyn atap ótken. Bul egemendi munaı óndirýdiń tómendeýi men MÓKJ-ǵa túsetin joǵary áleýmettik júkteme aıasynda oryn alyp otyr.
PetroMining pikirinshe, kóterińki mólsherlemeniń (95%) qoldanylýy jer qoınaýyn paıdalanýshylardyń ekonomıkasyna eleýli zıan keltiredi.
Alyp qoıý orta eseppen mynadaı bolýy múmkin edi:
2027 jyly: bir tonna munaıǵa 22 027 teńge,
2028 jyly: bir tonna munaıǵa 39 675 teńge.
Qaýymdastyqtyń memlekettik organdarmen baılanysy barysynda úkimet kóterińki aksız mólsherlemelerin qoldaný qaýipteri týraly tolyq habardar etildi.
PetroMining esepteýleri men negizdemeleri, sondaı-aq MÓKJ-nyń ujymdyq ótinishi memleket basshysynyń jáne úkimettiń ekonomıkalyq blogynyń nazaryna joldandy. Sonymen qatar «Atameken» ulttyq kásipkerler palatasymen, «QazMunaıGazben», energetıka mınıstrligimen jáne BAQ-pen pysyqtaý jumystary júrgizildi.
Úkimet qabyldaǵan sheshimniń qorytyndysy boıynsha PetroMining premer-mınıstr Oljas Bektenovke, «Atameken» UKP-ǵa, Energetıka mınıstrligine jáne QMG-ǵa máseleni obektıvti qaraǵany, jedel pysyqtaǵany jáne munaı sektory sýbektilerine qatysty ádil sheshim qabyldaǵany úshin alǵys bildirdi.