Bokstan úsh dúrkin álem chempıony Nazym Qyzaıbaı Azıada-2026-da alǵashqy kedergiden asa almady: 54 kg salmaq dárejesinde 1/8 fınalda tóreshilerdiń bólek sheshimimen Qytaı ókili Chjao Súanǵa 1:4 esebimen jeńilip qaldy, dep habarlaıdy infohub.kz saıty.
Jekpe-jek qazaqstandyq sportshynyń paıdasyna sheshilmedi. Bastapqy raýnd qytaılyq qarsylastyń enshisinde qaldy — tóreshilerdiń jazbasy boıynsha 4:1. Ekinshi kezeńde Chjao Súannyń basymdyǵy mardymsyz boldy — 3:2, al sońǵy úsh mınýtty bes tóreshi de biraýyzdan Qytaı ókiline berdi.
Qyzaıbaı úshin bul Azıa oıyndaryndaǵy ekinshi óner kórsetýi: ótken 2022 jylǵy Hanchjoý oıyndarynda ol shırek fınal satysynda kúresti aıaqtaǵan edi. Sonymen qatar qazaqstandyq sportshynyń qorjynynda 2024 jylǵy Olımpıadanyń qola medali jáne úsh álem chempıony ataǵy bar — ol álem birinshilikterinde 2014, 2016 jáne 2025 jyldary jeńiske jetken.
Al Qazaqstannyń taǵy bir ókili júlde úshin kúresin jalǵastyrýda. Kúni keshe Alýa Balkıbekova 51 kg dárejesinde úndistandyq Sakshı Chaýdharıdi utyp, shırek fınalǵa shyqty. Jartylaı fınalǵa joldama úshin ol 28 qyrkúıekte japondyq Iýna Nıshınakamen jekpe-jekke shyǵady.
Japonıadaǵy XX jazǵy Azıa oıyndary 19 qyrkúıekte resmı túrde ashyldy. Jarysqa 45 eldiń sportshylary qatysyp, 460 medal jıyntyǵyn sarapqa salýda. Azıada-2026-da Qazaqstan quramasynyń sapynda 35 sport túrinen 558 sportshy óner kórsetýde.