AQSH-tyń ulttyq basketbol qaýymdastyǵy (NBA) óz tarıhyndaǵy eń iri jazalardyń birin Los-Andjeles «Klıppers» klýbyna qoldandy. Bul — Kavaı Leonardty erkin agent retinde tartý kezinde jalaqy tóleý erejelerin aınalyp ótý áreketiniń saldary, dep habarlaıdy infohub.kz saıty.
Lıga klýbty bes birinshi aınalym draft-pıginen aıyrdy. Nátıjesinde, 2029-2033 jyldar aralyǵynda komandada tabıǵı tańdaý quqyǵy bolmaıdy. Sonymen qatar, «Klıppers» 30 mıllıon dollar aıyppul tóleıdi, al klýb ıesi Stıv Balmer bir jylǵa lıga men komandanyń barlyq is-sharalarynan shettetildi. Basketbol operasıalarynyń prezıdenti Loýrens Frenk alty aıǵa, al bıznes-operasıalar prezıdenti Djıllıan Sýker bir jylǵa jalaqysyz jumystan qaldyryldy.
Leonardtyń ózine 700 myń dollar aıyppul salyndy. Aıta keteıik, ol bıylǵy maýsymda 50 mıllıon dollar jalaqy alady. Al Forbes málimetinshe, Microsoft korporasıasynyń burynǵy bas dırektory Balmerdiń baılyǵy 152,7 mıllıard dollardy quraıdy.
NBA komısary Adam Sılver málimdemesinde: «Oıynshylardyń jalaqysyn anyqtaıtyn ujymdyq kelisim júıesi — lıganyń basketbol básekelestiginiń negizgi quramdas bóligi. Bizdiń erejelerimizdi óreskel buzý jáne «Klıpperstiń» osy quqyqbuzýshylyqqa ákelgen júıelik jáne basshylyq qatelikteri meni qatty renjitti. Jazanyń aýyrlyǵy buzýshylyqtardyń mańyzdylyǵyn kórsetedi», — dedi.
Leonard óz agenti arqyly taratqan málimdemesinde: «Men jaqyn ortamdaǵy adamdardyń qate sheshimderi úshin tolyq jaýapkershilikti óz moınyma alamyn jáne bul jaǵdaıdyń jankúıerler men otbasyma keltirgen qolaısyzdyǵyna ókinemin. «Klıpperspen» kelisimshartqa otyrǵanda men adal nıetpen, barlyq mindettemelerimdi oryndaýǵa daıyn boldym jáne eshkimniń jalaqy tóleý erejelerin aınalyp ótý nıeti týraly bilmedim», — dedi.