NBA «Los-Andjeles Klıppers» komandasyn jalaqy erejelerin buzǵany úshin 30 mıllıon dollarǵa (22,2 mıllıon fýnt sterlıń) aıyppul saldy. Bul — lıga tarıhyndaǵy eń iri aıyppul. Sebep — juldyzdy oıynshy Kaýaı Leonardqa mıllıondaǵan dollardy zańsyz jolmen berý áreketi. NBA esebinde Leonard «korttan tys tabys múmkindikterin alýǵa» qysym jasaǵany jáne «osy múmkindikterdi sátti paıdalanǵany» aıtylǵan.
Tergeý 2025 jyldyń qyrkúıeginde podkast jýrnalısi Pablo Torreniń Leonard pen Aspiration Fund Adviser LLC arasyndaǵy 28 mıllıon dollarlyq (20,8 mıllıon fýnt) jarnama kelisimsharty lıga erejelerin buzýy múmkin degen habarlamasynan keıin bastaldy. Nátıjesinde, «Klıppers» 2029-2033 jyldar aralyǵyndaǵy bes birinshi raýnd draft tańdaý quqyǵynan aıyrylady, al komanda ıesi Stıv Balmer Leonardtyń demeýshilik kelisimsharttaryna qatysty róli úshin barlyq lıga jáne komandalyq is-sharalarǵa 12 aıǵa qatysýdan shettetildi.
Eki dúrkin NBA chempıony Leonardqa lıga tarapynan 700 000 dollar (520 000 fýnt) aıyppul salyndy. NBA komısary Adam Sılver «Klıpperstiń» erejelerdi «óreskel buzýyna» «qatty renjigenin» bildirip, «aıyppuldardyń aýyrlyǵy buzýshylyqtardyń mańyzdylyǵyn kórsetetinin» aıtty.
«Klıpperstiń» bıznes-operasıalar jónindegi prezıdenti Djıllıan Sýker tergeýshilerge «jalǵan málimdemeler bergeni» úshin bir jylǵa jalaqysyz jumystan shettetildi. NBA bir aılyq tergeý barysynda «Klıppers uıymynyń buryn da jalaqy tóleý erejelerin aınalyp ótýge tyrysqanyn, endi birneshe ret ereje buzǵanyn anyqtaǵanyn» habarlady.
Sheshimnen keıin 35 jastaǵy Leonard óz áreketterine «tolyq jaýapkershilik alatynyn» jáne «bul jaǵdaıdyń jankúıerler men onyń otbasyna keltirgen alańdaýshylyǵyna ókinetinin» aıtty. Ol Instagram-da: «Men „Klıpperspen“ kelisimshartqa jáne atalǵan kelisimderge adal nıetpen otyrdym, mindetterimdi tolyq oryndaýǵa daıyn boldym jáne eshkimniń jalaqy tóleý erejelerin aınalyp ótý nıeti týraly bilmedim», — dep jazdy.
Eki dúrkin NBA fınalynyń MVP-i 2019 jyly «Klıpperske» qosylyp, franshızada jeti jyl ótkizgennen keıin bıyl ketti. NBA «Klıppers» uıymy men qyzmetkerlerine lıga baqylaıtyn bes jyldyq sáıkestik jáne monıtorıń baǵdarlamasy engiziletinin málimdedi.
«Klıppers» bul sheshimge «barlyq qoljetimdi joldarmen» shaǵymdanatynyn málimdedi. Komandanyń málimdemesinde: «Biz NBA-nyń qorytyndylaryn qatań túrde qabyldamaımyz. Bul — faktiler men dálelderge emes, aldyn ala belgilengen senarıdi aqtaýǵa baǵyttalǵan, óte birjaqty tergeýdiń nátıjesi. Lıga bizge jeke aıtqany men búgin jarıalaǵany — eki bólek nárse. Olar komısar Sılverdiń tergeýdiń ádildigi men dáldigin qamtamasyz etý týraly bastapqyda qoıǵan standarttaryn ózderi saqtamady», — delingen.
Leonard qazir tergeý aıaqtalǵanǵa deıin keıinge shegerilgen «Toronto Reptorsqa» aýysýyn aıaqtaýy kútilýde. ESPN-ge silteme jasaǵan «Klıpperstiń» málimdemesinde Balmerdiń advokaty Devıd Kellı komanda men onyń klıentine qatysty «vedma ańshylyǵy» júrgizilip jatqanyn jáne jazalardyń «óreskel ádiletsizdik» ekenin aıtty. Kellı: «Balmerdiń bedeline orny tolmas zaqym keldi, óıtkeni ol qazir tek osy birjaqty tergeýge ǵana emes, sonymen qatar azamattyq sot isine, Aspiration bankrottyǵyna jáne basqa da prosesterge tartylǵan», — dedi.