Qaza tapqan Nuraı Serikbaıdyń jaqyndary sottalýshydan 10 mlrd teńgeden astam materıaldyq jáne moraldyq zıandy óteýdi talap etý sebebin túsindirdi, dep habarlaıdy infohub.kz saıty.
Qaıtys bolǵan qyzdyń aǵasy Sultan Serikbaı Instagram-daǵy paraqshasynda buǵan birneshe sebep bar ekenin aıtty. "Zań turǵysynan aıtsaq, sottalǵan tarap bul qarajatty óteýden jaltarýǵa eshqandaı múmkindigi bolmaýy kerek, sondaı-aq keltirilgen zalaldy ótemeıinshe, merziminen buryn shartty túrde bosatý, jazany jeńildetý nemese ony jeńildetýdiń basqa da tásilderin paıdalana almaýy tıis. Sondyqtan soma sonshalyqty úlken bolýy kerek, ony jaı ǵana tólep, umytý múmkin bolmasyn. Beınelep aıtqanda, adam ony ómir boıy tóleıtindeı bolýy kerek", - dedi Sultan Serikbaı.
Ol bul somany otbasy ádil jáne negizdi dep sanaıtynyn qosty. "Moraldyq turǵydan alǵanda, eger álemdegi barlyq aqshany jınap, bizge berse de, olar Nuraıdyń joǵaltýyn eshqashan óteı almaıdy. Óıtkeni biz úshin adam ómiriniń quny aqshamen ólshenbeıdi. Eger bizge Nuraıdyń joǵaltýynan týyndaǵan aýyrsynýmen ómir súrý jazylǵan bolsa, onda aıyptalýshy tarap ta óz jazasy men jaýapkershiligin, onyń ishinde materıaldyq jaýapkershilikti de kóterýi kerek dep esepteımiz", - dep qosty qaıtys bolǵan qyzdyń aǵasy.
Sultan sondaı-aq, eger moraldyq ótemaqy alý múmkin bolsa, otbasy bul qarajatty stalkıng pen zorlyq-zombylyq qurbandary bolǵan basqa qyzdarǵa kómekke jumsaýdy josparlap otyrǵanyn málimdedi.
Eske salaıyq, qaıǵyly oqıǵa 11 qańtarda Shymkentte bolǵan. Aıyptalýshylar arasynda Sherhan Aımahan kisi óltirý, stalkıng jáne nekege turýǵa májbúrleý aıyptary boıynsha sot aldynda tur. Prokýror qylmystyń mán-jaıymen aıyptaý aktisin oqydy. Tergeý derekteri boıynsha, Nuraı Serikbaıǵa 35 pyshaq jaraqaty salynǵan. Qaıtys bolǵan qyzdyń otbasy sottalýshydan 10 mlrd teńgeden astam materıaldyq jáne moraldyq zıandy óteýdi talap etti.