Qazaqstanda ókpe qaterli isigi týraly habardarlyq aptalyǵy bastaldy. Osy aıasynda 1600-den astam adam tómen dozaly kompúterlik tomografıa arqyly tegin tekserýden óte alady. Bul ádis aýrýdy erte kezeńde, tipti kishkentaı ózgeristerdi de anyqtaýǵa múmkindik beredi. Qazaqstan bul ádisti qoldanatyn Ortalyq Azıadaǵy alǵashqy elderdiń biri boldy, dep habarlaıdy infohub.kz.

Elimizde jyl saıyn ókpe qaterli isiginiń tórt myńǵa jýyq jaǵdaıy anyqtalady, onyń eki myńǵa jýyǵy ólimmen aıaqtalady. Dárigerler mundaı statısıkany aýrýdyń kesh anyqtalýymen baılanystyrady. Sondyqtan erte dıagnostıkaǵa erekshe kóńil bólinedi, al tómen dozaly kompúterlik tomografıa Qazaqstanda alǵash ret engizilgen negizgi ádisterdiń biri bolyp tabylady.

«Kompúterlik tomografıa keýde qýysynyń árbir mıllımetrin qabat-qabat keskindeıdi. Mıllımetrlik qıyndylar 2-3 mıllımetrlik ókpe túıinderin jiberip almaýǵa múmkindik beredi. Bul óte erte anyqtaý, ókpe qaterli isiginen bolatyn ólimdi azaıtýǵa jetkizedi», — dep túsindiredi QazǴZIOıR radıologıa jáne ıadrolyq medısına bóliminiń meńgerýshisi Jandos Amanqulov.

Mamandardyń aıtýynsha, jańa ádistegi sáýlelik júkteme kádimgi kompúterlik tomografıa men flúorografıaǵa qaraǵanda aıtarlyqtaı tómen. Prosedýra birneshe sekýnd qana alady jáne arnaıy daıyndyqty qajet etpeıdi: ash bolýdyń, analız tapsyrýdyń nemese ádettegi dárilerdi qabyldaýdy toqtatýdyń qajeti joq.

«Tómen dozaly kompúterlik tomografıa arqyly joǵary qaýip tobyndaǵy pasıentterge skrınıng júrgizýdi josparlap otyrmyz. Bul — 50 jastan asqandar, temeki shegetinder, jaqynda temekini tastaǵan nemese uzaq ýaqyt shekkender, sondaı-aq zıandy jaǵdaıda jumys isteıtinder, shańmen, hımıkattarmen jáne kanserogendi zattarmen baılanysta bolatyndar», — dep atap ótti onkolog dáriger Baýyrjan Imanbekov.

Qazaqstandyqtar 15 tamyzǵa deıin tómen dozaly kompúterlik tomografıadan tegin óte alady. Barlyǵy 1600-den astam adamdy tekserý josparlanýda. Ókpeni tekserýge jazylý mekenjaılary men telefondaryn Qazaq onkologıa jáne radıologıa ǵylymı-zertteý ınstıtýtynyń saıtynan bilýge bolady. Eske salaıyq, Qazaqstanda turaqty negizde úsh túrli onkologıalyq skrınıng tegin júrgiziledi — sút bezi qaterli isigi, jatyr moıny qaterli isigi jáne kolorektaldy qaterli isik. Birinshi jartyjyldyqta eki mıllıonnan astam adam tekserýden ótti.