Oralda kóp epızodty alaıaqtyq isi boıynsha áıelge qatysty aıyptaý úkimi shyqty. Jábirlenýshilerge keltirilgen shyǵyn 158 mln teńgeden asqan, dep habarlaıdy infohub.kz saıty.
Batys Qazaqstan oblystyq sotynyń baspasóz qyzmeti málim etkendeı, Oral qalalyq soty sottalýshyny Qylmystyq kodekstiń 190-baby 4-bóliginiń 2-tarmaǵy boıynsha birneshe alaıaqtyq jasaǵany úshin kináli dep tanydy.
Anyqtalǵan mán-jaılarǵa sáıkes, 2024–2025 jyldary sottalýshy túrli bankterdiń qyzmetkeri retinde tanystyryp, azamattardyń senimine kirgen. Ipotekalyq nesıe rásimdeýge, jeńildikpen turǵyn úı satyp alýǵa, avtokólik bıznesine jáne jeke kásipkerligine ınvestısıa tartýǵa kómektesemin dep, joǵary paıyzdyq paıda ýáde etip, jábirlenýshilerden aqsha alǵan.
Bastapqy kezeńde tabysty qyzmet kórinisin jasaý úshin sottalýshy jańa qatysýshylardyń qarajaty esebinen somalardy paıyzymen tólep otyrǵan, keıin iri kólemdegi aqshany ıemdenip ketken. İs boıynsha barlyǵy 26 qylmystyq epızod anyqtalyp, shyǵyn kólemi 158 mln teńgeden asqan.
Sot otyrysynda sottalýshy kinásin tolyq moıyndap, aıyptaýda baıandalǵan mán-jaılardy rastady jáne ókinetinin málimdedi. Jazany jeńildetetin mán-jaı retinde áıel kámeletke tolmaǵan balasynyń tárbıesinde ekenin jáne densaýlyq jaǵdaıyn eskerýdi surady.
Sot úkimimen ol Qylmystyq kodekstiń 190-baby 4-bóliginiń 2-tarmaǵy boıynsha kináli dep tanylyp, oǵan 6 jyl 8 aıǵa bas bostandyǵynan aıyrý jazasy taǵaıyndaldy. Jazany ortasha qaýipsizdiktegi qylmystyq-atqarý júıesi mekemesinde óteıtin bolady. Qazaqstan Respýblıkasy Qylmystyq kodeksiniń 74-baby 1-bóliginiń negizinde sottalǵan áıeldiń 14 jasqa tolmaǵan balasy bolǵandyqtan, bas bostandyǵynan aıyrý jazasyn óteý 4 jylǵa keıinge shegerildi.
Buryn qoldanylǵan qamaýǵa alý bultartpaý sharasy joıylyp, sottalǵan áıel sot zalynda qamaýdan bosatyldy. Onyń minez-qulqyn baqylaý Oral qalasynyń probasıa qyzmetine júkteldi.
Jábirlenýshilerdiń kópshiliginiń materıaldyq shyǵyndy óteý týraly talaptary tolyq nemese ishinara qanaǵattandyrylyp, jalpy somasy 100 mln teńgeden asty. Eki jábirlenýshiniń azamattyq talaptary shyǵyndy tolyq óz erkimen óteýine baılanysty qaraýsyz qaldyryldy. Moraldyq zıandy óteý týraly talaptar qanaǵattandyrylmady.
Úkim zańdy kúshine engen joq jáne jarıalanǵan sátten bastap 15 táýlik ishinde apelásıalyq tártippen shaǵymdanýǵa bolady.