Qazaqstandyq boksshy Orazbek Asylqulov Azıada-2026-da alǵashqy jekpe-jeginde-aq jeńilip, týrnırdegi ónerin aıaqtady. 60 kelige deıingi salmaq dárejesindegi 1/8 fınalda Azıanyń qazirgi chempıony Ońtústik Koreıa ókili Don Hvan Chanǵa tóreshilerdiń bólek sheshimimen – 1:4 esebimen jol berdi, dep habarlaıdy infohub.kz saıty.
Eń tartysty bolǵan alǵashqy raýndta eki tóreshi Asylqulovqa upaı berse, úsheýi koreıalyq boksshyny qoldady. Ekinshi úsh mınýttyq úziliste Don Hvan Channyń tóreshiler paraqshasyndaǵy basymdyǵy 4:1 boldy. Qorytyndy raýndty da tóreshiler dál osy eseppen baǵalady.
Asylqulov úshin bul mansabyndaǵy alǵashqy Azıa oıyndary edi. 2025 jyly qazaqstandyq Dýbaıda 57 kelige deıingi salmaqta IBA álem chempıony atansa, 2026 jyldyń kókteminde Ulanbatyrda World Boxing Azıa chempıonatyn 60 kelige deıingi dárejede jeńip alǵan bolatyn. Buǵan deıin ol Azıa chempıonaty-2024-tiń kúmisin de ıelengen.
Asylqulov Qazaqstannyń erler quramasynan týrnırdegi ónerin aıaqtaǵan ekinshi ókil boldy. Buǵan deıin 80 kelige deıingi dárejede Sabyrjan Aqqalyqov ta alǵashqy jekpe-jeginde jeńilip qalǵan.
Sondaı-aq búgin Oıyndar-2026-daǵy ónerin Olımpıada-2024-tiń qola júldegeri ári álemniń úsh dúrkin chempıony Nazym Qyzaıbaı da aıaqtady.
Japonıadaǵy XX jazǵy Azıa oıyndary 19 qyrkúıekte resmı túrde ashyldy. 45 eldiń sportshylary qatysatyn jarysta 460 komplekt medal sarapqa salynýda. Azıada-2026-da Qazaqstan quramasynyń quramynda 35 sport túrinen 558 sportshy synǵa túsýde.
Azıada-2026 sholýlary: 1-kún, 2-kún, 3-kún, 4-kún, 5-kún.