Senbide, 29 tamyzda, Qazaqstan Premer-lıgasynyń 24-týry bastalyp, tórt mach ótti. Chempıonat kóshbasshysy «Ordabasy» «Qyzyljardy» iri eseppen utsa, «Oqjetpes» «Qaısardan» basym tústi, al «Ulytaý» men «Jeńis» te úsh upaıdan ıelendi... dep habarlaıdy infohub.kz.
«Ordabasy» óz alańynda «Qyzyljardy» 3:0 esebimen senimdi túrde tize búktirdi. Toǵyzynshy mınýtta-aq brazılıalyq Leo Natel esep ashty, úzilisten keıin shymkenttikterdiń basymdyǵyn gandyq Devıd Abagna arttyrdy, al úshinshi goldy Everton soqty. Andreı Martın shákirtteri 55 upaı jınap, «Qaırattan» aıyrmashylyǵyn jeti balǵa jetkizdi, alaıda almatylyqtardyń eki oıyny qorda tur.
Kúnniń eń nátıjeli machy Qyzylordada ótti. «Oqjetpes» 28-mınýtta-aq Oralhan Ómirtaev pen Nurǵaını Bóribaevtyń goldarymen «Qaısardan» 2:0 esebimen alǵa shyqty. Nuraly Jaqsylyq alań ıeleriniń aıyrmashylyǵyn qysqartty, al úzilisten keıin Borıs Lotoskı men Ramazan Baǵdat gol almasty — qonaqtar paıdasyna 3:2. Kókshetaýlyqtar 39 upaı jınap, úshinshi oryndaǵy «Astanamen» teńesti, astanalyqtardyń eki oıyny qorda.
Jezqazǵanda «Ulytaý» «Jetisýdy» iri eseppen utty. Taldyqorǵandyqtar birinshi goldy óz qaqpasyna soǵyp aldy — buryshtamadan keıin Nurbol Anýarbekov erekshelendi. Ekinshi taımda Hırokı Harada alań ıeleriniń basymdyǵyn eseledi, al qosymsha ýaqytta Ilá Chernák esepti irilendirdi. «Ulytaý» 31 upaı jınap, jetinshi orynǵa kóterildi, al «Jetisý» 19 upaımen tómengi satyda qaldy.
«Jeńis» qatarynan ekinshi ret jeńiske jetti. «Altaı» qaqpasyna jalǵyz goldy 67-mınýtta horvatıalyq Andrıa Fılıpovıch soqty. Segiz mınýttan keıin ol dúbl jasaı alar edi, biraq penaltıdi soǵa almady. Bul jeńisten keıin astanalyq klýb 29 upaı jınap, segizinshi orynda tur.
24-týr 30 tamyzda «Ertis» — «Aqtóbe», «Kaspı» — «Tobyl» jáne «Atyraý» — «Astana» machtarymen jalǵasady. Týrdyń ortalyq oıyny «Elimaı» men «Qaırat» arasynda 31 tamyzda Semeıde ótedi. Jeńis jaǵdaıynda qazirgi chempıon «Ordabasydan» aıyrmashylyqty qaıta qysqarta alady.