Otbasy bankiniń basshysy Lázzat Ibragımova banktiń turǵyn úı qurylys jınaqtary salymshylaryna memlekettik syıaqyny esepteý tásilin ózgertetinin habarlady. Syıaqyny tek shynymen turǵyn úıge jınaqtap, ony áli satyp ala almaǵandar ǵana ala alady, dep habarlaıdy infohub.kz saıty.
Úkimet otyrysynyń qorytyndysy boıynsha ótken brıfıńte Otbasy bankindegi salymdar boıynsha memlekettik syıaqyny tóleý tásili qalaı ózgeretini jáne ony memlekettiń ornyna kim tóleıtini týraly suraq qoıyldy.
Otbasy bankiniń basshysy olardyń turǵyn úı qurylys jınaqtary júıesi Germanıa úlgisi boıynsha qurylǵanyn atap ótti. Onda da turǵyn úı jınaqtary boıynsha memleketten syıaqy tólenedi, biraq ol otbasynyń tabysyna baılanysty. Eger otbasynyń tabysy 155 myń eýrodan aspasa, salymshyǵa memleketten 300 eýro kóleminde syıaqy tólenedi. Otbasy joq jalǵyzbasty adamdar úshin shek jylyna 70 myń eýro, al syıaqy – 150 eýro.
«Munda biz salymshylardyń ártúrli otbasylyq tabystaryna qatysty kóptegen zertteýler júrgizemiz. Qazir birinshi tásil maquldandy – eger adam sanaly túrde júıege kelip, jylyna 18% beretin depozıtterge balama bolǵan kezde 2% turǵyn úıge jınaqtasa, ol syıaqy alady. Eger ol júıeden shyǵatyn bolsa, memlekettik syıaqy búdjetke qaıtarylady. Bul – únemdeýdiń alǵashqy úlken rezervi. Ekinshi rezerv – eger adam turǵyn úı jaǵdaıyn jaqsartsa, ıaǵnı biz oǵan ıpoteka bersek, mysaly, «Umaı» boıynsha, «jasyl ıpoteka» boıynsha, 2% nemese 5% nesıelik turǵyn úı aıasynda, onda kepildegi depozıtke memlekettik syıaqy eseptelmeıdi», – dedi Lázzat Ibragımova.
Ibragımovanyń aıtýynsha, salymdarǵa memlekettik syıaqy saqtalady, biraq onyń kózderi ózgeredi. Syıaqynyń bir bóligi banktiń memleket ıeligindegi aksıalaryna tólenetin dıvıdendter esebinen tólenetin bolady.
Otbasy bankiniń basshysy memlekettik syıaqyny tóleýde qandaı da bir ózgerister qabyldansa, olar tek jańa salymshylarǵa qatysty bolatynyn naqtylady.
«Eger bul qabyldansa, tek jańadan ashylatyn sharttarǵa ǵana qatysty bolady. Sondyqtan qazir salym ashqan barlyq salymshylar qoldanystaǵy zań aıasynda qyzmet kórsetiletin bolady», – dedi bank basshysy.
2026 jyldyń basynda Otbasy banki turǵyn úı jınaq salymdary boıynsha memlekettik syıaqyny tóleýge qajetti somanyń 50% deıin jınaý úshin alǵan paıdasynyń bir bóligin jumsaı bastaýy múmkin dep habarlanǵan bolatyn.