Павлодар облысындағы қылмыстық-атқару жүйесі мекемелерінің бірінде прокурорлық тексеру барысында Sony PlayStation ойын приставкасы, 15 смартфон және алты Wi-Fi роутер табылды. Тыйым салынған заттардың тәркіленуіне байланысты немқұрайлылық туралы бап бойынша сотқа дейінгі тергеп-тексеру басталды, деп хабарлайды infohub.kz сайты.
Облыс прокуратурасының нақтылауынша, заттар режимнің сақталуын тексеру және тыйым салынған заттардың келу арналарын анықтау кезінде бір бөлмеден табылған. Телефондар, роутерлер мен приставкадан бөлек, сымсыз және сымды құлаққаптар, USB-кабельдер, флеш-карталар және сотталғандарға сақтауға әрі пайдалануға тыйым салынған басқа да заттар тәркіленді.
Halyqstan дерегінше, прокуратура редакцияға ұсынған суретте PlayStation 4, оның жанында екі геймпад пен Mortal Kombat X ойынының дискісі бейнеленген.
Прокуратура Қазақстан Республикасы Қылмыстық кодексінің 371-бабы — «Немқұрайлылық» бойынша сотқа дейінгі тергеп-тексеруді тіркеді. Тергеу тыйым салынған заттардың режимдік нысанға қалай кіргенін, оларды қандай арналар арқылы өткізгенін және бұған кімнің қатысы болуы мүмкін екенін анықтап жатыр.
Қазақстан Республикасы Қылмыстық-процестік кодексінің 201-бабына сәйкес тергеу мүддесі үшін өзге мәліметтер жарияланбайды.
Бұған дейін «Курсив» жазғандай, шілдеде Ақтөбе тергеу изоляторына палау салынған контейнердің қос түбіне жасырылған iPhone 15 Pro Max өткізуге әрекет жасалған. Смартфон азық-түлік беруді тексеру кезінде табылып, жіберушіге әкімшілік хаттама толтырылды.