Petropavldaǵy Maǵjan Jumabaev atyndaǵy joǵary kolejdiń jataqhanasynda turatyn segiz stýdent «dene terisiniń dermatofıtıasy» degen aldyn ala dıagnozben aýrýhanaǵa jatqyzyldy. Bul — halyq arasynda temiretki dep atalatyn sańyraýqulaq ınfeksıasy, dep habarlaıdy infohub.kz saıty.
Segiz naýqas týraly shuǵyl habarlama 25 qyrkúıekte kópbeıindi oblystyq aýrýhanadan Petropavl qalalyq sanıtarıalyq-epıdemıologıalyq baqylaý basqarmasyna tústi.
Basqarmanyń epıdemıologıalyq baqylaý bóliminiń jetekshisi Anara Qurǵanbaevanyń aıtýynsha, barlyq naýqastar jataqhananyń bir qabatynda turady. Olardyń bólmeleri qatar ornalasqan, stýdentter arasynda tyǵyz turmystyq qarym-qatynas bolǵan.
Qazirgi tańda dıagnoz naqtylanyp jatyr. Teri-venerologıalyq dıspanserde patologıalyq materıalǵa zerthanalyq zertteý júrgizilýde.
Kolej ben jataqhanada epıdemıologıalyq tergeý uıymdastyryldy. Mamandar ınfeksıa kózin jáne onyń taralý joldaryn anyqtaýda.
Jataqhanada jáne naýqastardyń turǵylyqty jerinde qorytyndy dezınfeksıa júrgizildi. Kolejde de epıdemıaǵa qarsy sharalar josparlanǵan.
Emdeý aıaqtalǵan soń dárigerler naýqastardy bir aı boıy baqylaıdy. Osy kezeńde olardyń jaǵdaıyn tekserý úshin eki ret zerthanalyq zertteý júrgiziledi.
Buǵan deıin Kursiv Health qaraǵandylyq úsh stýdentten týberkýlez anyqtalǵanyn habarlaǵan bolatyn.