Qazaqstan İshki ister mınıstrligi quramynda psıhotroptyq jáne kúshti áser etetin zattar bar dárilik quraldardyń zańsyz aınalymyna tosqaýyl qoıý jumysyn júıeli júrgizip keledi. Osy baǵyttaǵy jumys barysynda Petropavlda júzý jattyqtyrýshysy ustalyp, odan kúshti áser etetin dárilerdiń 56 tabletkasy tárkilendi, dep habarlaıdy infohub.kz saıty.
İİM-niń aqparattyq medıaportalynyń málimetinshe, jyl basynan beri polıseıler densaýlyq saqtaý organdarymen birlesip toqsan saıyn «Darmek» jedel-profılaktıkalyq is-sharasyn ótkizip keledi. Onyń maqsaty — azamattardyń densaýlyǵyn qorǵaý jáne quramynda psıhotroptyq pen kúshti áser etetin zattar bar dárilik quraldardyń zańsyz aınalymyna jol bermeý.
Jumys barysynda mundaı dárilerdiń dáriger reseptisiz berilý faktileri anyqtalýda — oǵan dárihana qyzmetkerleri de, farmasevtıkalyq qyzmetke qatysy joq ózge de adamdar da barady.
«Atalǵan dárilerdiń kámeletke tolmaǵandarǵa satylýy erekshe alańdaýshylyq týdyrady. Mundaı dárilik quraldar tek dárigerdiń taǵaıyndaýy boıynsha berilýi tıis, óıtkeni olardy baqylaýsyz qoldaný aýyr zardaptarǵa, sonyń ishinde ólimmen aıaqtalatyn dozadan asyp ketýge ákep soǵýy múmkin», — dep atap ótti vedomstvoda.
İİM dereginshe, kezekti kezeń 21-25 qyrkúıek aralyǵynda ótkizildi. 1500-den astam medısınalyq mekeme men dárihana, sondaı-aq 142 ónerkásip kásiporny tekserildi. 249 ákimshilik quqyq buzýshylyq anyqtaldy. Quramynda esirtkisi bar 28 myń dárilik quraldyń aınalymy shekteldi.
Sonymen qatar hımıalyq zattar men prekýrsorlardyń zańdy aınalymnan zańsyz aınalymǵa ótýine jol bermeý sharalary qabyldanýda. Túrli prekýrsorlardyń 675 tonnasynyń aınalymy shektelip, 90 zańdy tulǵa ákimshilik jaýapkershilikke tartyldy.
Mysaly, Petropavlda júzý jattyqtyrýshysy ustalyp, odan kúshti áser etetin zattardyń 56 tabletkasy tárkilendi. Túrkistanda bir dárihanada kúshti áser etetin zattardyń lısenzıasyz satylǵany anyqtalyp, 5 myńnan astam tabletka tárkilendi. Oralda lısenzıalaý normalaryn buzǵany úshin 500 tonna tuz qyshqylynyń aınalymy shekteldi.