InfoHub Logo

Petropavl qalasynda 53 jastaǵy sanıtar áıel telefon alaıaqtarynyń qurbany bolyp, óz páterinen jáne 18 mıllıon teńgeden aıyryldy. Bul týraly Qazaqstan Media habarlady.

Qańtar aıynda Soltústik Qazaqstan oblysynda ınternet-alaıaqtyq boıynsha 33 derek tirkelse, byltyr bul kórsetkish 49-ǵa jetken. Onyń 19-y «bank qońyraýy» sqemasy boıynsha jasalǵan.

Alaıaqtar áýeli «domofondy aýystyrý», «eseptegishti tekserý» nemese «emhanadaǵy kezek týraly» degen jeleýmen habarlasyp, adamdy SMS-ten kelgen kodty aıtýǵa májbúrleıdi. Keıin olarǵa «sizdiń atyńyzǵa nesıe rásimdeldi», «páterińiz satylymǵa shyǵaryldy» degen sıaqty jalǵan aqparattardy jetkizedi.

Qorǵaný úshin adamdarǵa jınaǵan aqshalaryn alýǵa, «aınalymdaǵy» nesıelerdi rásimdeýge nemese páterin tez arada satyp, aqshany «qaýipsiz shotqa» aýdarýǵa keńes beredi.

Alaıaqtardyń kezekti qurbany

Dál osylaısha, Petropavldaǵy aýrýhanada jumys isteıtin sanıtar áıel aldanyp qaldy. Qarasha men jeltoqsan aılary aralyǵynda «bank menedjeriniń» nusqaýlarymen alaıaqtarǵa aqsha aýdaryp, qańtar aıynyń basynda ǵana aldanǵanyn túsingen. Onyń shyǵyny 18 mıllıon teńgeden asqan.

Qazirgi tańda bul is boıynsha polıseıler tergeý amaldaryn júrgizip jatyr. Oqıǵa oblystyq polısıa departamenti basshylyǵynyń baqylaýynda.

Polısıa eskertedi

Polısıa departamentiniń baspasóz qyzmeti SMS arqyly kelgen tórt tańbaly kodtyń ózi adamnyń atynan nesıe rásimdeýge múmkindik bermeıtinin atap ótti. Alaıda, bul kod kıber alaıaqtarǵa jeke derekterge qol jetkizýge jol ashady. Bul aqparatty paıdalanyp, olar memlekettik organdardyń qyzmetkerleri sıaqty senimdi túrde áreket ete alady. Tipti, páterdi satyp alýǵa májbúrleý úshin jalǵan satyp alý-satý sharttaryn WhatsApp arqyly jiberýi de yqtımal.

Polıseıler turǵyndardy alaıaqtardyń aıla-sharǵysyna ermeýge, SMS kodtaryn eshkimge habarlamaýǵa jáne belgisiz tulǵalardyń qysymymen eshqandaı qarjylyq operasıa jasamaýǵa shaqyrady. Kúdikti jaǵdaılar týyndasa, dereý polısıaǵa habarlasyp, aqparatty resmı arnalar arqyly tekserý qajet.