InfoHub Logo

Qyzylorda oblysynyń Jańaqorǵan aýdanynda joǵalyp ketken 20 jastaǵy jigittiń máıiti sý qubyry qudyǵynan tabyldy. Bul qaıǵyly oqıǵaǵa kúdikti retinde marqumnyń 15 jastaǵy inisi ustalyp, qamaýǵa alyndy.

Bul týraly Infohub.kz aqparat agenttigi habarlaıdy.

Oqıǵanyń mán-jaıy

Marqumnyń týystarynyń aıtýynsha, 20 jastaǵy jigittiń moınynda jiptiń izi bolǵan, al denesinde kógergen jaraqattar baıqalǵan. Oqıǵa 30 mamyr kúni bolǵan. Sol kúni jas jigit úıiniń janynda dalada jatqan matrasta uıyqtaǵan. Alaıda, tańerteń ol iz-túzsiz joǵalyp ketken. Jaqyndary izdeý jumystaryn bastap, kelesi kúni onyń máıitin sý qubyry qudyǵynan tapqan.

Anasynyń aıtýynsha

«Ústinde qyzyl jaıma boldy. Sol jaımamen tunshyqtyrylǵan. Máıitti shyǵaryp jatqanda, denesinen kógergen izderdi kórdim. Ol ómiri úshin kúresken. Oǵan keminde eki-úsh adam qatysqan sıaqty. 15 jastaǵy ulymdy kúdikti retinde ustap áketti», – deıdi marqumnyń anasy.

Týystary kishi balasynyń mundaı qylmysqa barýy múmkin emes ekenin aıtyp otyr. Olardyń pikirinshe, 15 jastaǵy balanyń 20 jastaǵy jigitke fızıkalyq turǵydan kúshi jetýi qıyn. Sondaı-aq, olar bul qaıǵyly oqıǵanyń úıinde buryn bolǵan urlyqtarmen baılanysty bolýy múmkin degen boljam aıtýda.

Polısıa tergeýde

Qaıǵyly oqıǵaǵa qatysty oblystyq Polısıa departamenti habarlama taratty. Onda 1 maýsymda Qyzylorda oblysy Jańaqorǵan aýdanynyń turǵynyn óltirý faktisi boıynsha qylmystyq is qozǵalǵany aıtylǵan. Kúdikti ustalyp, sot sanksıasymen qamaýǵa alynǵan. Qazirgi ýaqytta bolǵan oqıǵanyń barlyq mán-jaıyn anyqtaýǵa baǵyttalǵan sotqa deıingi tergep-tekserý áreketteri júrgizilip jatyr. Tergeý múddesine baılanysty ózge aqparat jarıa etilmeıdi.