InfoHub Logo

Prezıdent Túrki memleketteri uıymynyń qarjy yntymaqtastyǵyn nyǵaıtýǵa basa mán berdi,dep jazady Infohab.

Astanada Túrki memleketteri uıymyna (TMU) múshe elderdiń Ortalyq (ulttyq) bankteri keńesiniń alǵashqy otyrysy ótti. Jıynǵa Memleket basshysy Qasym-Jomart Toqaev tóraǵalyq etti.

Prezıdent óz sózinde jýyrda Majarstanda ótken beıresmı samıtte TMU elderi basshylary yntymaqtastyqty tereńdetýdiń mańyzyn taǵy da naqtylaǵanyn atap ótti. Onyń aıtýynsha, tarıftik saıasattyń ózgerýinen týyndaǵan jahandyq ekonomıkalyq transformasıa jaǵdaıynda bul máseleniń ózektiligi artyp otyr.

– Qazirgi kúrdeli jaǵdaıda týyndaǵan qıyndyqtarmen birge jańa múmkindikter de bar. Ásirese, kólik jáne logıstıka, aýyl sharýashylyǵy, sıfrlandyrý men qarjy salalarynda kúsh-jigerdi úılestirý qajet, – dedi Memleket basshysy.

Prezıdent Túrki memleketteriniń álemdik jalpy ishki ónimdegi jıyntyq úlesi 2010 jylǵy 2,4%-dan 3,1%-ǵa deıin artqanyn atap ótip, bul aımaqtyń makroekonomıkalyq turaqtylyǵynyń nyǵaıa túskenin jetkizdi.