Qazaqstan Respýblıkasy Prezıdenttigine kandıdat N.Á.Nazarbaevty jaqtaýshylar forýmynda sóılegen sóz
Almaty. Respýblıka saraıy. 04.01.1999 jyl
Biz jaqynda jazýshy, jýrnalıs Kamal ekeýmiz Jezqazǵan jazırasyna, qart Qarsaqbaı, Ulytaý óńirine baryp kaıttyq. Myń-san saılaýshylarmen kezdestik.
Men qazir tek sol halyqtan estigenimdi aıtamyn.
Saılaýshylar amanat aıtty:
— Dúnıege kelgen jas sábı jetige jetkenshe jerden taıaq jeıdi. Odan keıin shinjáý, dimkás, meshel bolmasa júgirip júrip ketedi, — dedi.
— Qazaqstan atty jas memleket azattyq alǵaly jeti jyl ótti. Jeti jastan asqansha Qazaqstan jerden taıaq jegen joq. Jemqorlardan, Paraqorlardan, Qorqaýlardan qorlyq kórdi, — dedi.
Saılaýshylar ókpe aıtty:
— Jer — bizdiń Anamyz. Anasy balasyn qorlamaıdy, — dedi.
—Bizdi qorqaýlardan qorǵaı almaǵan prokýratýraǵa, mılısıaǵa, kaýipsizdik qyzmetkerlerine, sotqa, kedenge ókpelimiz, — dedi.
— Olar tek maıda-shúıde shabaqtardy aýlaıdy. Shortandar men jaıyndar áli taırańdap júr, — dedi.
Saılaýshylar amanat aıtty:
— Prezıdent Nursultan qorqaýlarmen kúresti kúsheıtý týraly Jarlyq jarıalady. Endi sodan naqty nátıje shyǵarsyn dedi. Sonda Jer — Ananyń dáýleti ózimizge buıyrady. Sonda biz qınalmaımyz, — dedi.
Saılaýshylar aıtty:
— Kezinde Túrkıa halqy Mustafa Kemal Atatúrikke qandaı sense, biz de Nursultanǵa sondaı senemiz, — dedi.
— Qazirgi kezeń — býyrqanǵan, tolqyǵan telegeı teńiz sıaqty. Qazaqstan sol teńizde júzip bara jatqan alyp keme sıaqty, dedi. Al kapıtan — Nursultan, — dedi.
— Qazaqstanda Nursultandaı basqa da ul-qyzdar bar, — dedi. Nursultannan basqa jaramdy azamat týmasa, ultqa uıat, — dedi.
— Biraq dál qazir keme kapıtanyn aýystyrýǵa bolmaıdy, — dedi.
— Qazaqstan kemesin kóp jyldan beri Nursultan basqaryp keledi, qalaı basqarýdy biledi. Ol — teńizdiń qyr-syryn jaqsy meńgergen. Jańadan basqa bireý kelse, ol teńiz astyndaǵy jasyryn jartastarǵa, jaý tastarǵa kemeni soǵyp alýy múmkin, — dedi.
Saılaýshylar senim aıtty:
— Alyp kemeni daýyldan aman alyp shyǵatyn Prezıdent Nursultan, — dedi.
— Qazaqstan esimdi alyp kemeni Nuh paıǵambar sıaqty jartastarǵa, jaý tastarǵa soǵyp almaı, ashyq aıdynǵa, qoı ústine boztorǵaı jumyrtqalaıtyn jasyl jaǵalaýǵa alyp shyqsyn Nursultan, — dedi.
Taǵy da saılaýshylar aıtty:
— Nursultan bizdi bále-jaladan, qaranıet qaqtyǵystardan aman alyp qaldy, — dedi. Bizdiń duǵamyz: Ózin ólme, ózgeni de óltirme!
— Nursultan bizdi álemge tanytty. Álem bizdi moıyndady. Áldenip alsaq, álem bizdi syılaı túsetin bolady, —dedi.
Saılaýshylar amanat aıtty:
— Nursultan halyqaralyq, ultaralyq dana dáneker. Shekaramyzdy taspen de, dospen de qorshaı bereıik, — dedi.
Saılaýshylar ókinish bildirdi:
— Respýblıka aýyl sharýashylyǵynyń kósemderi kózimizge kók shybyn úımelete jazdady. Nursultan osyǵan qatty nazar aýdarsyn, — dedi.
— Aýyl mádenıetin, jalpy mádenıetti ólimsiretpesin,—dedi. Atatúrik aıtqan: «Mádenıeti kem el — bir kózi soqyr, bir aıaǵy aqsaq kemtar adam sıaqty» degen.
Biz kórgen, biz tyńdaǵan halyqtyń talap-tilegi, amanaty osyndaı.
Laıym da osy tilek qabyl bolǵaı!