«Progres MS-35» júk kemesi Baıqońyr ǵarysh aılaǵynan Halyqaralyq ǵarysh stansıasyna attandy. Ekıpajǵa qajetti qordan bólek, ol orbıtaǵa qashyqtan basqarylatyn robotpen júrgiziletin eksperımentke arnalǵan jabdyqty jetkizedi, dep habarlaıdy infohub.kz saıty.
«Soıýz-2.1b» zymyrany 16 qyrkúıekte Máskeý ýaqytymen 16:34-te (Astana ýaqytymen 18:34-te) 31-alańnyń ushyrý kesheninen ushty. «Roskosmos» kemeniń belgilengen orbıtaǵa shtattyq rejımde shyqqanyn, zymyrannyń úshinshi satysynan bólingenin jáne kún panelderi men antenalaryn ashqanyn málimdedi.
«Progres MS-35» barlyǵy 2,4 tonnadan astam júk jetkizedi. Onyń ishinde 842 kg otyn, 420 kg sý, 50 kg ottegi, 275 kg azyq-túlik, dári-dármek, gıgıena quraldary, stansıa jumysyna qajetti jabdyq pen shyǵys materıaldary bar.
Júktiń bir bóligi ǵylymı eksperımentterge, sonyń ishinde «Teledroıdqa» arnalǵan.
Eksperıment aıasynda ǵaryshkerler antropomorfty robottyń ashyq ǵaryshta qashyqtan basqarý arqyly jekelegen operasıalardy oryndaı alatynyn tekseredi.
Osy maqsatta stansıaǵa ǵaryshkerdiń arnaıy jumys orny — ekzoskelet jiberildi. Onyń kómegimen operator robottyń qozǵalysyn basqara alady. Operator retinde jumysqa daıyndyqty «Roskosmos» ǵaryshkeri Anna Kıkına ótti.
«Teledroıdtyń» ózi HǴS-qa kelesi júk kemesimen keledi.
Eksperıment barysynda ekıpaj robottyń zattardy saqtaý ornynan alyp, quraldy ǵaryshkerge bere alatynyn jáne onymen túrli operasıalardy oryndaı alatynyn tekserýdi josparlap otyr.
«Progres MS-35» stansıanyń reseılik segmentindegi «Poısk» modýlimen 19 qyrkúıekte Máskeý ýaqytymen 16:46-da túıisedi.
Buǵan deıin Kýrsıv Reseıdiń 2027 jyly Baıqońyrdy jalǵa alýy úshin Qazaqstanǵa 55 mlrd teńgeden astam tóleıtinin habarlaǵan.
Al qarsańynda «Roskosmos» basshysy Dmıtrı Bakanov Qazaqstannyń Baıqońyrdy halyqaralyq ǵarysh habyna aınaldyrý bastamasy Reseımen yntymaqtastyqqa áser etpeıtinin málimdedi.