Шетелдік Axis Holding Ltd. компаниясының Қазақстандағы шоттары қылмыстық іс аясында бұғатталып, Алматы облысындағы жобаның жүзеге асуына қауіп төнген. Алайда Бас прокуратураның Инвесторлар құқығын қорғау комитеті компания құқығын қалпына келтірді, деп хабарлайды infohub.kz сайты.
Шетелдік компанияның басшысы Василий Филимонов кәсіпорын деректері Антифрод-орталықтың ақпараттық жүйесіне енгізілгеннен кейін қадағалау органына жүгінген. Бұғаттау алаяқтық туралы істі тергеу барысында қойылған. Алайда инвестордың тергеліп жатқан қылмысқа ешқандай қатысы болмаған.
Шектеу шаралары компанияның ағымдағы шаруашылық қызметіне айтарлықтай кедергі келтірді. Құны 120 млрд теңгеден асатын ірі мал шаруашылығы кешенінің құрылысы тоқтап қалу қаупіне ұшырады. Жоба 400-ден астам жаңа жұмыс орнын ашуды көздейді. Қостанай облысының прокуратурасымен бірлескен тексеру қолданылған санкциялардың заңсыздығын растады.
«Қабылданған шаралардың нәтижесінде қылмыстық қудалау органдары жіберілген бұзушылықтарды жойды. Инвестордың Антифрод-орталық жүйесіндегі мәртебесі қайта қаралып, банк шоттарындағы шектеулер толығымен алынды. Комитеттің жедел араласуы инвестор құқығын сот талқылауынсыз қалпына келтіруге мүмкіндік берді», — деп түсіндірді Комитет прокуроры Динара Нұрсұлтанова.
Axis Holding Ltd басшысы Василий Филимонов прокуратура органдарына мәселені жедел әрі объективті шешкені үшін алғыс айтты.
«Шетелдік инвестор үшін қиын жағдайда жалғыз қалмайтынын білу аса маңызды. Біздің жағдай Қазақстандағы инвесторларды қорғау тетіктерінің шынымен жұмыс істейтінін көрсетті. Сондықтан басқа да шетелдік инвесторларға Қазақстанға қаражат салудан және жобаларды жүзеге асырудан қорықпауға кеңес берер едім», — деп атап өтті кәсіпкер.
Ол компанияның республикадағы ұзақ мерзімді инвестициялық жоспарларын жалғастыруды көздеп отырғанын қосты.
Комитетте іс жүргізу шараларын өткізу заңды кәсіпкерлік қызметті негізсіз шектемеуі тиіс екені еске салынды. Инвесторлар қылмыстық қудалау аясына заңсыз тартылған жағдайда ведомство бизнесті қорғау жөніндегі шараларды жедел қабылдауды қамтамасыз етеді.
Axis Holding Ltd компаниясын 36 жастағы Германия азаматы Василий Филимонов басқарады. Кәсіпорын Қазақстанның аграрлық секторындағы шетелдік инвестор ретінде әрекет етеді.
2026 жылдың шілдесінде Қазақстанның Бас прокуратурасы еліміз бойынша 3,3 мың инвестициялық жобаны қадағалауға және қорғауға алды. Сүйемелденетін жобалардың жалпы сомасы 112 трлн теңгеге жетеді. Қадағалау ведомствосы үш мыңнан астам кәсіпкердің құқығын қорғап үлгерді. Бұл 270 ірі өндірістің іске қосылуын қамтамасыз етіп, экономикаға 30 мың жаңа жұмыс орнын берді.