Ertede bir kedeı baıdyń úıine kelse, jurt jıylyp, toı bolyp jatady. Menmensigen baı oǵan jasyń úlken edi, tórge shyq demeıdi. Sonda kedeı qarıa turyp:
— Oıpyr-aı, baıeke, jańa aýyldan shyqqanymda, aldymnan bir arlan qasqyr tura kep qashqany. Dereý tazymdy qostym da jiberdim. Tazym da jelaıaq edi, degenmen qasqyr da júırik eken, — degen kezde, erigip otyrǵan baı eleń-eleń etip:
— Iá, tazyń qýyp jetti me? — deıdi.
Sonda qart oǵan:
— Joq, baıeke, qasqyr dál ana sizdeı, tazy dál myna mendeı jerde otyrdy, — dep jaýap beripti. Kóp aldynda uıalǵan baı kedeıge:
— Tórletińiz, tórletińiz! — dep beripti.