Samarqandta (Ózbekstan) 46-shy Dúnıejúzilik shahmat olımpıadasynyń úshinshi týrynyń machtary ótti. Qazaqstannyń áıelder quramasy Slovenıa komandasyn utyp, jeńis serıasyn jalǵastyrdy, dep habarlaıdy infohub.kz saıty.
Slovenıalyq qarsylastar qatysýshylar reıtıńinde 25-orynda tur, alaıda úsh qazaqstandyq shahmatshy óz partıalarynda jeńiske jetti. Alýa Nurman Zala Ýrhty utty, Elnaz Kalıahmet Nadıa Shpankodan basym tústi, al Zarına Nurǵalıeva Anjı Beberdi jeńdi.
Birinshi taqtada Bıbısara Asaýbaeva Laýra Ýnýkpen teń oınady. Qazaqstandyq shahmatshy úshin bul týrnırdegi ekinshi qatarynan teń oıyn.
Osylaısha, Qazaqstannyń áıelder quramasy úshinshi ret qatarynan jeńiske jetti. Áıelder týrnırine barlyǵy 189 komanda qatysýda.
Qazaqstannyń erler quramasy úshinshi týrda Fransıaǵa 0,5:3,5 esebimen jol berdi. Ulttyq komandaǵa jalǵyz jarty upaıdy 2021 jylǵy blıs boıynsha álem chempıony Maksım Vashe-Lagravpen teń oınaǵan Denıs Mahnev ákeldi.
Saýat Nurǵalıev, Aldıar Ansat jáne Jandos Aǵmanov óz partıalarynda jeńilis tapty.
Buǵan deıin qazaqstandyq shahmatshylar Gaıtı men Nıgerıa quramalaryn utqan bolatyn. Olımpıadanyń erler týrnırine 205 komanda qatysýda.