Japonıada ótip jatqan 2026 jylǵy Azıa oıyndarynyń qorytyndy machynda Qazaqstannyń sý dobynan áıelder quramasy Ózbekstan komandasyna jol berdi, dep habarlaıdy infohub.kz saıty.
Sońǵy týrda chernogorıalyq bapker Zoran Maslovar shákirtteri ózbekstandyqtarmen kezdesti. Negizgi ýaqyt 8:8 esebimen teń aıaqtaldy, qarsylastar fınaldyq sırenaǵa úsh sekýnd qalǵanda esepti teńestirdi.
Penaltı serıasynda komandalar aldymen qatarynan bes gol soqty, biraq keıin alǵash bolyp qazaqstandyqtar qatelesti. Osynyń arqasynda Ózbekstan 14:13 (6:5) esebimen jeńiske jetti.
Qazaqstan quramasy aınalma týrnırdi alty upaımen aıaqtady. Ol úshinshi orynda tur, alaıda qola medal ázirge kepildi emes. Eger Taıland komandasy sońǵy machynda negizgi ýaqytta Sıngapýrdy jeńse, júldege dál sol komanda qol jetkizedi. Ózbekstandyqtar jarysty bes upaımen aıaqtady. Altyndy Qytaı men Japonıa quramalary ózara talasta oınaıdy.
Aıta keteıik, Qazaqstan quramasy áıelder sý doby qoıylǵan barlyq aldyńǵy Azıa oıyndarynda júldeger atanǵan: Gýanchjoý-2010 men Djakarta-2018 oıyndarynda kúmis, Inchhon-2014 pen Hanchjoý-2022 oıyndarynda qola.