Qazaqstanda jalǵan dıplom jasap usynǵan 20 saıttyń jumysy toqtatyldy. Bul faktiler boıynsha materıaldar QR İshki ister mınıstrligi men QR Mádenıet jáne aqparat mınıstrligine joldandy, dep habarlaıdy infohub.kz.
QR Ǵylym jáne joǵary bilim mınıstrligi búginde óz úlgisindegi dıplomdar arnaıy júıe arqyly ǵana qalyptasatynyn eske saldy. Ár qujatqa biregeı nómir men QR-kod avtomatty túrde beriledi, al dıplom tek túlektiń derekteri Joǵary bilimniń biryńǵaı platformasynda bolǵan jaǵdaıda ǵana jasalady.
«Óz úlgisindegi bilim qujattarynda biregeı nómir men QR-kod bolmasa, olar jaramsyz bolyp sanalady», — dep atap ótti vedomstvoda.
Mınıstrlikte dıplomdar bazasy 1991 jyldan beri berilgen qujattardy qamtıtynyn túsindirdi. Júıege tek joǵary oqý oryndarynyń ýákiletti qyzmetkerleri ǵana qol jetkize alady, al dıplom nómiri bilim alýshy týraly málimetter negizinde avtomatty túrde jasalady.
Jumys berýshiler men túlekter dıplomnyń túpnusqalyǵyn Joǵary bilimniń biryńǵaı platformasynyń servısi arqyly teksere alady. Qujattyń elektrondy nusqasy eGov qosymshasynyń «Sıfrlyq qujattar» bóliminde de qoljetimdi.
Mınıstrlik jalǵan dıplom jasaý, satý jáne paıdalaný qylmystyq jaýapkershilikke ákep soǵatynyn eske saldy. QR Qylmystyq kodeksiniń 385-babyna sáıkes, buzýshylarǵa aıyppul, túzeý jumystary, bas bostandyǵyn shekteý nemese eki jylǵa deıin bas bostandyǵynan aıyrý jazasy qarastyrylǵan.
Buǵan deıin «Kýrsıv» «Qazaqtelekom» basshysy Baǵdat Mýsınniń búgingi tańda tabysty mansap úshin bir ǵana joǵary bilimniń jetkiliksiz ekenin aıtqanyn jazǵan bolatyn. Onyń pikirinshe, mamandar kásibine qaramastan baǵdarlamalaý, jasandy ıntellekt jáne kompúterlik ǵylymdardy meńgerýi qajet, óıtkeni dál tehnologıalar men beıindik pánder toǵysynda jańa jańalyqtar men suranysqa ıe mamandyqtar paıda bolady.