Qazaqstan polıseıleri bir apta ishinde Jol qozǵalysy erejeleriniń 10 myńǵa jýyq buzýshylyǵyn anyqtady. Ásirese drıft pen mas kúıde kólik júrgizýshilerge erekshe nazar aýdaryldy. Bul týraly İshki ister mınıstrligi habarlady, dep jazady infohub.kz.
Anyqtalǵan buzýshylyqtardyń ishinde 201 mas kúıde kólik júrgizý faktisi tirkeldi. Osyndaı jaǵdaılardyń biri túnde Úshtóbe qalasynda boldy: polıseıler Toyota Marino kóligin toqtatty, onyń rólinde 34 jastaǵy mas er adam otyrǵan. Sot ony 15 táýlikke qamaýǵa alyp, jeti jylǵa júrgizýshi kýáliginen aıyrdy.
Sonymen qatar, vedomstvo drıft pen qaýipti júrgizý faktilerin toqtatý polıseılerdiń turaqty baqylaýynda ekenin atap ótti. Sońǵy aptada mundaı buzýshylyqtar Astana, Qostanaı jáne Shymkent qalalarynda anyqtaldy.
Máselen, astanada eki jas júrgizýshi Shamshı Qaldaıaqov kóshesinde drıft jasady. Ekeýi de 10 táýlikke qamaýǵa alynyp, kólikteri arnaıy turaqqa qoıyldy. Qostanaıda drıft beınebaqylaý kameralaryna túsip, júrgizýshi tez anyqtaldy. Ol jyl basynan beri JQE buzǵany úshin 16 ret jaýapkershilikke tartylǵany belgili boldy. Sot oǵan 15 táýlik qamaý jazasyn taǵaıyndady. Al Shymkentte 18 jastaǵy Mercedes-Benz júrgizýshisi drıft jasap, túnde tynyshtyqty buzdy — ol da 10 táýlikke qamaýǵa alyndy.
Budan bólek, 21 qyrkúıekten bastap elimiz boıynsha 13 myńnan astam zańsyz jazý men graffıtı joıyldy. Alty myńnan astam ákimshilik is qozǵaldy. Tórt eń aýyr fakti boıynsha sotqa deıingi tergeý bastaldy: bireýi — vandalızm, taǵy úsheýi — esirtki graffıtıi boıynsha.
Sondaı-aq, apta ishinde polıseıler izin sýytpaı bir kisi óltirý, ólimge ákep soqqan aýyr dene jaraqatyn qasaqana keltirýdiń úsh faktisi, 11 tonaý, 218 urlyq, sondaı-aq jeti mal urlyǵy men segiz kólik urlyǵyn ashty, dedi İİM.
Aıta keteıik, jaqynda Mercedes-Benz júrgizýshisi Qazaq handyǵy eskertkishiniń janynda drıft jasap, qamaýǵa alynǵan bolatyn.