Qostanaıda 21 jastaǵy jergilikti turǵyn joldyń ústinde ádeıi drıft jasap, shınalarymen jol tósemin búldirdi. Ol dereý qamaýǵa alyndy — bolǵan oqıǵa týraly infohub.kz saıty habarlaıdy.
Qostanaı oblysy polısıa departamentiniń baspasóz qyzmeti málim etkendeı, oblys ortalyǵynda jolda drıft jasaǵan júrgizýshi 15 táýlikke qamaýǵa alyndy.
«Polıseıler beınebaqylaý kameralarynyń kómegimen joldyń ústinde ádeıi drıft jasaǵan júrgizýshini anyqtady. Osy manevrlerdiń saldarynan jol tóseminde avtokólik shınalarynyń izderi qalyp, betki qabaty búlindi. Buzýshy anyqtalyp, polısıa bólimine jetkizildi. Ol Qostanaı qalasynyń 21 jastaǵy turǵyny M. B. bolyp shyqty», — dedi departamentte.
Polısıa dereginshe, jyl basynan beri ol jol júrý erejelerin buzǵany úshin 16 ret ákimshilik jaýapkershilikke tartylǵan. Sonymen qatar buryn usaq buzaqylyq úshin bir ret ákimshilik jaýapkershilikke tartylǵan.
Sot sheshimimen oǵan 15 táýlik qamaý túrindegi ákimshilik jaza taǵaıyndaldy. Jol tóseminiń búliný saldary joıyldy.