Qostanaı qalalyq soty avtokólik ıesiniń Qostanaı ákimdiginiń qurylys bólimine qoıǵan talap-aryzyn qanaǵattandyryp, ashyq qaraý lúgine soqtyǵysý saldarynan keltirilgen zalal úshin ótemaqy óndirdi, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda jarıalanǵandaı, jol-kólik oqıǵasy saldarynan keltirilgen materıaldyq zalaldy óndirý týraly azamattyq is qaraldy.
Sot anyqtaǵandaı, ótken jyldyń qazan aıynda talap qoıýshyǵa tıesili Chevrolet kóliginiń júrgizýshisi Bereke shaǵyn aýdanyndaǵy júris bóliginde ornalasqan ashyq qaraý lúgine soqtyǵysqan. Oqıǵa saldarynan kólikke mehanıkalyq zaqym kelgen.
Buǵan deıin jaýapker qaraý lúkterin ustaý erejelerin buzyp, kólik zaqymyna ákep soqqan JKO úshin ákimshilik jaýapkershilikke tartylǵan.
Sot talqylaýy barysynda jaýapkerdiń ókili nysandaǵy qurylys jumystary aıaqtalmaǵanyn, qaýipsizdik úshin merdiger jaýapty bolýy tıis ekenin alǵa tartyp, talapty qanaǵattandyrýǵa qarsylyq bildirdi. Alaıda sot qaraý lúgi jaýapkerdiń jaýapty ustaýynda bolǵanyn, al onyń kinásin joqqa shyǵaratyn dálelder usynylmaǵanyn anyqtady.
Sot sheshimimen talap talaptary qanaǵattandyryldy. Jaýapkerden talap qoıýshynyń paıdasyna 205 400 teńge materıaldyq zalal, sondaı-aq baǵalaýǵa jumsalǵan 85 myń teńge óndirildi.