Qostanaıda dárigerler múmkin emes isti tyndyrdy: denesinen 27 myń vólttan astam tok ótken 15 jasar balanyń ómirin saqtap qaldy. Oqıǵa jasóspirimniń ádemi sýretke túsý úshin temirjol vagonyna shyǵýy kezinde bolǵan, dep habarlaıdy infohub.kz saıty.
Qostanaı oblystyq balalar aýrýhanasynyń travmatolog-ortopedi Mıras Eljasovtyń aıtýynsha, oqıǵa 25 maýsymda bolǵan. Bala aýrýhanaǵa óte aýyr jaǵdaıda jetkizilgen.
«Ol temirjol vagonyna shyǵyp, áleýmettik jelige salý úshin sýretke túskisi kelgen. Sonyń saldarynan elektr jaraqatyn alyp, denesiniń 60 paıyzynan astamy qatty kúıik shalǵan. Ony dereý reanımasıa bólimine jatqyzdy, onda bir jarym aı jatty. Baqytymyzǵa oraı, qol-aıaǵyn saqtap qalýǵa múmkindik týdy», — dedi Eljasov.
Dárigerdiń aıtýynsha, álemdik jáne respýblıkalyq statısıkaǵa sáıkes, mundaı jaraqat alǵan balalardyń 90 paıyzy alǵashqy aptada kóz jumady, alaıda bul jasóspirim aman qaldy. Jaqynda ony reanımasıadan jaı palataǵa aýystyrdy.
Balanyń ájesi kóz jasyn tyıa almaı, sol kúni oǵan polısıa qyzmetkerleri qońyraý shalyp, qaıǵyly jaǵdaıdy habarlaǵanyn aıtty. Ol bul telefon alaıaqtary dep oılap, tútikti tastaǵan. Biraq birneshe mınýttan keıin baqytsyzdyqtyń shynymen de olardyń úıine kelgenin túsingen.
Jasóspirimniń ózi de sol kúngi oqıǵany eske alyp: «Biz dostarymmen úıge qysqa jolmen barýdy jón kórip, temirjolmen júrdik. Poıyzdy kórip, sýretke túsý ıdeıasy keldi. Men vagonnyń tóbesine otyrdym, dosym meni sýretke túsirdi. Keıin ne bolǵanyn maǵan dosym aıtyp berdi. Men turǵanda elektr doǵasy soqty. Sonyń saldarynan sekirip, 2 metrge ushyp kettim. Esimnen tanyp qaldym, esime kelgende úıge barǵym keldi, biraq jedel járdem dárigerleri aýyrsynýdy basatyn dári egip, aýrýhanaǵa apardy. Qabyldaý bóliminde báriniń maǵan úlken kózben qaraǵany esimde, sodan keıin esimnen tanyp qaldym», — dedi.
Basylymnyń málimetinshe, sol sýret saqtalyp qalǵan, tipti bala ony áleýmettik jelige jarıalaǵan. Dárigerlerdiń ómirdi saqtaý jolyndaǵy aýyr jumysy bir jarym aıǵa sozyldy. Jasóspirim jýrnalıserge tańdaǵan mamandyǵyn ózgertýge sheshim qabyldaǵanyn aıtty: oqıǵadan eki kún buryn 9-synyp túlegi elektrık mamandyǵyna qujat tapsyrǵan edi. Endi ol medısına salasyna barǵysy keletinin aıtty.